पुणे: पुण्यातील आळंदी परिसरात घडलेल्या दुहेरी हत्येच्या घटनेने संपूर्ण शहर हादरले आहे. एका सहा (Pune Crime) वर्षीय चिमुकलीसह 75 वर्षीय ज्येष्ठ महिलेची निर्घृण हत्या झाल्याने परिसरात भीतीचे वातावरण निर्माण झाले असून नागरिकांमध्ये तीव्र संताप व्यक्त केला जात आहे. (Latest Marathi News)
मृतांमध्ये धनश्री केदारी ही सहा वर्षांची मुलगी आणि संगीता शिंदे या ज्येष्ठ महिलेचा समावेश आहे. धनश्रीची आजी संगीता केदारी या रुग्णालयात हाऊसकीपिंगचे काम करतात. नेहमीप्रमाणे कामावर जाण्यापूर्वी त्यांनी नात धनश्रीला शेजारी राहणाऱ्या संगीता शिंदे यांच्या घरी झोपण्यासाठी सोडले होते. मात्र सकाळी परत आल्यानंतर घरात भीषण दृश्य दिसले आणि दोघींची हत्या झाल्याचे उघड झाले.
प्राथमिक तपासात अज्ञात व्यक्तीने बोथट हत्याराने हा हल्ला केल्याची शक्यता व्यक्त केली जात आहे. विशेष म्हणजे, घराचा दरवाजा उघडा होता, मात्र कपाटातील मौल्यवान वस्तूंना हात लावलेला नव्हता. त्यामुळे चोरीच्या उद्देशाने हा खून झाल्याचा संशय पोलिसांनी फेटाळला असून, हत्येमागील नेमके कारण अद्याप अस्पष्ट आहे.
घटनेची माहिती मिळताच पोलीस, फॉरेन्सिक पथक आणि डॉग स्कॉड घटनास्थळी दाखल झाले. आरोपीचा माग काढण्यासाठी विशेष पथके तैनात करण्यात आली असून परिसरातील सीसीटीव्ही फुटेजची तपासणी सुरू आहे.
दरम्यान, धनश्रीची आजी संगीता केदारी यांचा आक्रोश मन हेलावून टाकणारा आहे. “आजच तिला पहिलीत घालायचं होतं,” असे म्हणत त्यांनी अश्रूंना वाट मोकळी करून दिली. लहानपणापासून नातीचा सांभाळ करणाऱ्या आजीचे या घटनेत सर्वस्व हिरावले गेले आहे.
या दुहेरी हत्येमुळे आळंदी परिसरात भीती आणि असुरक्षिततेची भावना वाढली आहे. आरोपींना तातडीने अटक करून कठोर शिक्षा देण्याची मागणी नागरिकांकडून जोर धरत आहे. सध्या पिंपरी-चिंचवड पोलीस या प्रकरणाचा सखोल तपास करत आहेत.
