पुणे: पुण्यातील गजबजलेल्या एफसी रोड परिसरात शनिवारी (Pune Shocking News) रात्री घडलेल्या एका धक्कादायक घटनेने नागरिकांना हादरवून सोडले. खाऊगल्लीमध्ये सुमारे 9.15 वाजण्याच्या सुमारास, नेहमीप्रमाणे गर्दी असताना आदित्य सातपुते (वय 41) यांनी स्वतःच्या गळ्यावर ब्लेडने वार करत आत्महत्येचा प्रयत्न केला. हा प्रकार इतक्या अचानक घडला की उपस्थित लोक काही क्षणांसाठी स्तब्ध झाले. (Latest Marathi News)
मिळालेल्या माहितीनुसार, आदित्य सातपुते हे मूळचे मुंबईतील बोरिवलीचे रहिवासी असून सध्या पुण्यातील भोसले नगरमध्ये राहत होते. काही दिवसांपूर्वी त्यांची नोकरी गेल्याने ते मानसिक तणावाखाली होते. याच नैराश्यातून त्यांनी हे टोकाचे पाऊल उचलल्याची प्राथमिक माहिती समोर आली आहे.
घटना घडताच नागरिकांनी तत्परता दाखवत तातडीने मदत केली. जखमी अवस्थेत असलेल्या सातपुते यांना जवळच्या खासगी रुग्णालयात दाखल करण्यात आले असून, सध्या त्यांच्यावर उपचार सुरू आहेत. त्यांची प्रकृती स्थिर असल्याची माहिती डॉक्टरांकडून मिळत आहे.
घटनेची माहिती मिळताच पोलिसांनीही घटनास्थळी धाव घेतली. प्राथमिक तपासात नोकरी गमावल्यामुळे आलेल्या मानसिक तणावातून हा प्रकार घडल्याचा अंदाज व्यक्त करण्यात येत आहे. मात्र, यामागे इतर काही कारणे आहेत का, याचाही तपास सुरू आहे.
