पुणे: नगरपरिषद निवडणुका जाहीर झाल्याच्या (Police Inspector Transfer) पार्श्वभूमीवर पुणे जिल्हा पोलिस दलात (Pune Police) मोठ्या प्रमाणात फेरबदल करण्यात आले आहेत. जिल्हा पोलिस अधीक्षक संदीपसिंह गिल यांनी पाच पोलिस निरीक्षकांच्या बदल्यांचे आदेश जारी केले आहेत. या बदल्यांमुळे बारामती, इंदापूर आणि वाहतूक शाखांमध्ये नवीन नियुक्त्या करण्यात आल्या आहेत.
बारामती शहर पोलिस ठाण्याचे निरीक्षक विलास नाळे यांची बदली इंदापूर पोलिस ठाण्यात करण्यात आली आहे. तर, वाहतूक शाखेचा नुकताच पदभार स्वीकारलेले निरीक्षक श्रीशैल चिवडशेट्टी यांच्याकडे बारामती शहर पोलिस ठाण्याची जबाबदारी सोपवण्यात आली आहे.
इंदापूर पोलिस ठाण्याचे निरीक्षक सूर्यकांत कोकणे यांची बदली सायबर पोलिस ठाण्यात करण्यात आली आहे. तसेच, नव्याने जिल्ह्यात हजर झालेल्या निरीक्षक विजयमाला पवार यांची नियुक्ती जिल्हा विशेष शाखा 2 येथे करण्यात आली आहे. दरम्यान, निरीक्षक निलेश माने यांची बदली बारामती वाहतूक शाखेत करण्यात आली आहे.
जिल्हा पोलिस अधीक्षकांनी दिलेल्या माहितीनुसार, प्रशासकीय गरज आणि जनहित लक्षात घेऊन या बदल्या करण्यात आल्या आहेत. आगामी नगरपरिषद निवडणुकांच्या पार्श्वभूमीवर कायदा आणि सुव्यवस्था अबाधित ठेवण्यासाठी अनुभवी अधिकाऱ्यांची नियुक्ती करण्यात आल्याचेही पोलिस सूत्रांनी सांगितले.
या फेरबदलांमुळे बारामती आणि इंदापूर विभागांतील पोलिस यंत्रणेच्या कार्यपद्धतीत नवीन ऊर्जा आणि बदल पाहायला मिळतील, अशी अपेक्षा व्यक्त केली जात आहे.
