लोणावळा, (पुणे) : मुंबई-पुणे महामार्गावर टाकवे खुर्द गावाजवळ भरधाव कार उलटून अपघात झाल्याची घटना घडली आहे. या अपघातात १० वर्षाच्या मुलांसह एकाचा दुर्दैवी मृत्यू झाला आहे. तर तिघे गंभीर जखमी झाले असून, त्यांच्यावर रुग्णालयात उपचार सुरू आहेत. ही घटना रविवारी (ता.२८) मध्यरात्री बारा वाजण्याच्या सुमारास घडली.
बबन राघु सुतार (वय-५०, रा. म्हाळसकर कॉलनी, वडगाव मावळ), आर्यन ज्ञानेश्वर भालेकर (वय-१०, रा. जाधववाडी, नवलाख उंबरे, ता. वडगाव मावळ) अशी मृत्युमुखी पडलेल्यांची नावे आहेत. या अपघातात मयूर ज्ञानेश्वर पंडीत (वय-२६, रा. मळवली), प्रवीण नागू लोहार (वय-३४, रा. मळवली), रत्नेश बाबासाहेब सोनवणे (वय-२१, रा. भाजे) अशी जखमी व्यक्तींची नावे आहेत.
त्यांच्यावर रुग्णालयात उपचार सुरू आहेत. याप्रकरणी मोटारचालक प्रवीण नागू लोहार (वय-३४, रा. मळवली) याच्याविरुद्ध गु्न्हा दाखल करण्यात आला आहे. याबाबत मयूर पंडीत यांनी लोणावळा ग्रामीण पोलीस ठाण्यात फिर्याद दिली आहे.
रविवारी रात्री बाराच्या सुमारास बाह्यवळण मार्गावरुन मयूर आपल्या नातलगांसह पुण्याच्या दिशेने निघाला होता. टाकवे खुर्द गावाजवळ वळणावर अतिवेगामुळे चालकाचे मोटारीवरील नियंत्रण सुटले आणि मोटार महामार्गालगत लोखंडी कठडे तोडत खड्ड्यात कोसळली. या अपघातात सुतार आणि भालेकर यांच्या डोक्याला गंभीर दुखापत झाली. त्यांना तातडीने खासगी रुग्णालयात दाखल करण्यात आले. मात्र उपचारांपूर्वीच त्यांचा मृत्यू झाला. पोलीस उपनिरीक्षक भारत भोसले तपास करत आहेत.
