Pimpri News : पिंपरी : प्रदीप जांभळे-पाटील यांची पुन्हा महापालिका अतिरिक्त आयुक्तपदी नियुक्ती करण्यात आली आहे. ही नियुक्ती दोन वर्षांसाठी करण्यात आली आहे. महाराष्ट्र प्रशासकीय लवादाच्या (मॅट) आदेशानुसार प्रतिनियुक्तीच्या पदाकरितेची पात्रता तपासून ही नियुक्ती करण्यात आली आहे. त्यांची दोन वर्षांसाठी नियुक्ती असणार आहे. याबाबतचे आदेश शासनाच्या उपसचिव प्रियांका कुलकर्णी-छापवले यांनी काढले.
अतिरिक्त आयुक्त पदावरील प्रतिनियुक्ती पुढील दोन वर्षांसाठी कायम
पिंपरी-चिंचवड महापालिकेत प्रतिनियुक्तीने उपायुक्त असलेल्या स्मिता झगडे यांची १३ सप्टेंबर २०२२ रोजी राज्य शासनाने अतिरिक्त आयुक्तपदी नियुक्ती केली होती. (Pimpri News) महापालिका आयुक्तांनी दहा दिवस त्यांना रूजू करून घेतले नव्हते. त्यानंतर राज्य शासनाने २२ सप्टेंबर २०२२ रोजी झगडे यांची नियुक्ती रद्द करुन प्रदीप जांभळे यांची अतिरिक्त आयुक्तपदी नियुक्ती केली. पण, झगडे यांनी जांभळे यांच्या नियुक्तीला महाराष्ट्र प्रशासकीय लवादामध्ये आव्हान दिले होते.
जांभळे यांची अतिरिक्त आयुक्तपदावरील नियुक्ती २२ सप्टेंबर २०२३ पर्यंतच राहील. त्यादिवसापासून जांभळे यांची दोन वर्षांची नियुक्ती संपुष्टात येईल. (Pimpri News) जांभळे यांची पात्रता पुन्हा तपासावी, असे निर्देश ‘मॅट’ने शासनाला दिले होते. त्यानुसार प्रतिनियुक्तीच्या पदाकरिताची पात्रता पुन्हा तपासण्यात आली. सक्षम प्राधिकाऱ्यांच्या मान्यतेने जांभळे यांची महापालिका अतिरिक्त आयुक्त पदावरील प्रतिनियुक्ती पुढील दोन वर्षांसाठी कायम ठेवण्यात आली आहे.
