पिंपरी-चिंचवड : पिंपरी-चिंचवडमध्ये आज बोलताना राज्याचे उपमुख्यमंत्री अजित पवार यांनी गुंडगिरी आणि दहशत निर्माण करणाऱ्यांना कडक शब्दांत इशारा दिला आहे. “महिला, मुलींना सुरक्षित वाटलं पाहिजे. तुम्ही इथे येऊन नोकरी-व्यवसाय करा. नियमात असेल, त्याला आमचा विरोध नाही. पण, आम्ही कुणाचीही गुंडगिरी, दहशत खपवून घेणार नाही. वेळ पडल्यास ‘मकोका’ (MCOCA) लावला जाईल,” असे त्यांनी स्पष्ट केले आहे.
यावेळी त्यांनी नागरिकांशी संवाद साधताना कायदा आणि सुव्यवस्थेवर भर दिला. ते म्हणाले, “महिला, मुली आणि मातांना सुरक्षित वाटलं पाहिजे. गुंडगिरी आणि गुन्हेगारी खपवून घेतली जाणार नाही. वेळ आली तर त्यांच्यावर मकोका लावण्याचे स्पष्ट निर्देश आम्ही पोलिसांना दिले आहेत.” नागरिकांना शहरात आनंदाने व्यवसाय आणि नोकरी करण्याचे आवाहनही त्यांनी केले. परंतु, कुणीही त्रास देण्याचा किंवा फसवणूक करण्याचा प्रयत्न केल्यास त्याला अजिबात माफ केले जाणार नाही, असा इशाराही त्यांनी दिला आहे.
ते पुढे म्हणाले की, ‘शहराच्या विकासासाठी आणि तरुणांना रोजगार मिळवण्यासाठी तंत्रज्ञानाकडे लक्ष देणे गरजेचे आहे. पूर्वी आयटी, बायोटेक्नॉलॉजीला महत्त्व होते, आता आर्टिफिशियल इंटेलिजन्स (AI) ने जग व्यापले आहे. आपणही त्या दिशेने पुढे जाणे आवश्यक आहे.”
