पिंपरी : बैलगाडा शर्यत पाहणे, हा शौकिनांसाठी मोठ्या औत्स्युक्याचा विषय असतो. चाकणमधील घाटावर हजारो प्रेक्षकांच्या उपस्थितीत छकडी बैलगाडा शर्यतीचा थरार अनुभवण्याची संधी मिळाली. भिर्रर्रर्र… झाली अन् शर्यतीला सुरवात झाली. कात्रज येथील निसर्ग गार्डनच्या सुंदर आणि हारण्या या बैलजोडीने मानाचा ‘महान भारत केसरी’ किताब पटकावला. या बैलजोडीच्या मालकाला मानाची थार मोटार मिळाली.
चाकण येथील बैलगाडा घाटावर, आमदार महेश लांडगे यांच्या वाढदिवसानिमित्त, विकास नाईकवाडी यांच्या पुढाकाराने छकडी शर्यत बैलगाडा स्पर्धा आयोजित केली होती. स्पर्धेसाठी महाराष्ट्रासह मध्यप्रदेश, पंजाब, उत्तरप्रदेश या राज्यांमधून बैलगाडा मालक सहभागी झाले होते. थार मोटार, टेम्पो, ट्रॅक्टर, ७० दुचाकी अशा बक्षिसांची उधळण यानिमित्ताने करण्यात आली.
या स्पर्धेचा आनंद ६०० छकडी आणि ५० हजार बैलगाडा प्रेमींनी घेतला. पुण्यातील सुंदर आणि हारण्या, विट्यातील बब्या आणि बावऱ्या, वाघोलीतील सरपंच आणि २२११ पिस्टन या बैलजोडीने अनुक्रमे प्रथम, द्वितीय आणि तिसरा क्रमांक पटकावला.
सर्वोच्च न्यायालयाने महाराष्ट्रातील बैलगाडा शर्यतीवरची बंदी हटवली. या निर्णयाने ग्रामीण महाराष्ट्राला मोठा दिलासा मिळाला. बैलगाडा शर्यतबंदी उठवण्यासाठी सुरू केलेल्या लढ्याला अखिल भारतीय बैलगाडा संघटनेसह सर्वच संस्था, संघटना आणि शर्यतप्रेमींनी योगदान दिले आहे. हा शेतकऱ्यांचा थरारक खेळ टिकला पाहिजे. अशा स्पर्धांमुळे ग्रामीण अर्थचक्र सक्षम होत आहे.
– महेश लांडगे, आमदार
