पुणे: शहरातील वाहतूक समस्यांवर तोडगा काढण्यासाठी पुणे शहर पोलिस आयुक्तालयाच्या वतीने एक मोठा आणि महत्त्वाचा निर्णय घेण्यात आला आहे. लवकरच इथे अत्याधुनिक तंत्रज्ञानाने सुसज्ज अशी वाहतूक प्रशिक्षण अकादमी सुरू होणार आहे. ही महाराष्ट्रातील दुसरी वाहतूक अकादमी असून, केवळ पोलिसच नाही तर सामान्य नागरिक, शालेय विद्यार्थी आणि स्कूल बस चालकांनाही इथे वाहतूक नियम आणि व्यवस्थापनाचे प्रशिक्षण दिले जाणार आहे, अशी माहिती पोलिस आयुक्त अमितेश कुमार यांनी दिली.
अकादमीची उद्दिष्ट्ये:
- सर्वांसाठी प्रशिक्षण: पुणे शहर, पिंपरी-चिंचवड आणि पुणे ग्रामीण भागातील वाहतूक पोलिस अधिकारी व कर्मचाऱ्यांना या अकादमीमध्ये विशेष प्रशिक्षण दिले जाईल. यासोबतच, वाहतुकीचे नियम मोडणाऱ्या वाहनचालकांनाही काही ठराविक काळासाठी प्रशिक्षण घेणे अनिवार्य असेल.
- वाहतूक समस्यांवर दीर्घकालीन उपाय: ‘आय.टी.एम.एस’ (ITMS) उपक्रमांतर्गत ही अकादमी स्थापन करण्यात येत आहे. इथे वाहतुकीचे कायदे, नियमांची अंमलबजावणी आणि नागरिकांशी संवाद साधण्याचे कौशल्य शिकवले जाईल.
- जागेची निश्चिती: मुख्यमंत्री देवेंद्र फडणवीस आणि उपमुख्यमंत्री अजित पवार यांच्या पुणे दौऱ्यात पोलिस आयुक्तांनी या अकादमीचा प्रस्ताव मांडला होता, ज्याला तात्काळ मंजुरी मिळाली आहे. येरवडा येथे या अकादमीसाठी जागा निश्चित करण्यात आली आहे.
पोलिस आयुक्त अमितेश कुमार म्हणाले की, “पुणे, पिंपरी-चिंचवड आणि पुणे ग्रामीण भागातील वाहतूक व्यवस्थापनासाठी ही संस्था एक उत्तम आदर्श ठरेल.
