पुणे : पुणे – मुंबई द्रुतगती महामार्गावर अपघात रोखण्यासाठी वाहतूक नियमांचे काटेकोर पालन करण्यासंदर्भात संबंधित यंत्रणेला सूचना देण्यात आल्याची माहिती मंत्री शंभूराज देसाई यांनी दिली. तसेच वेगावर नियंत्रण, लेन कटिंग टाळणे, अवजड वाहनांनी नियम पाळणे या बाबींकडे लक्ष देण्यात येईल, अशी माहिती देखील देसाई यांनी दिली. विधानसभा सदस्य भीमराव तापकीर यांनी उपस्थित केलेल्या मुद्द्यावर उत्तर देताना त्यांनी ही माहिती दिली आहे.
शंभूराज देसाई पुढे म्हणाले की, रस्ते सुरक्षेसंदर्भात सुधारित धोरण यापूर्वीच तयार करण्यात आले आहे. त्याची प्रभावी अंमलबजावणी करण्यासाठी परिवहन विभाग, पोलिस, महामार्ग पोलिस, राष्ट्रीय रस्ते विकास यंत्रणा यांच्या माध्यमातून प्रयत्न करण्यात येतील. मुख्यमंत्री एकनाथ शिंदे यांनी दिनांक 17 ऑक्टोबर 2022 रोजी बैठक घेऊन यंत्रणेला यासंदर्भात निर्देश दिले आहेत.
तसेच या महामार्गावर अपघात टाळण्यासाठी जे प्रयत्न करण्यात येत आहेत त्यामुळे सन 2016 पासून अपघात संख्या आणि अपघातामुळे होणारे मृत्यू यात घट होत असल्याचे दिसून येत आहे. स्पीड गनची संख्या वाढवणे, अवजड वाहने डाव्या मार्गिके मधूनच जातील याकडे लक्ष देणे याबाबत परिवहन विभाग आणि महामार्ग पोलिसांना सूचना देण्यात आल्या आहेत. मात्र, अधिक सुरक्षित प्रवासासाठी ज्या उपाययोजना आवश्यक आहेत त्या केल्या जातील, असे मंत्री देसाई यांनी सांगितले आहे.
दरम्यान, मुंबई-पुणे द्रुतगती नवीन व जुन्या महामार्गावर अपघाताचे प्रमाण कमी करणे, वाहन चालकांमध्ये शिस्त निर्माण व्हावी यासाठी 1 डिसेंबर पासून पुढील 6 महिन्यांसाठी 24 तास ‘सुरक्षा’ या रस्ता सुरक्षा जनजागृती आणि अंमलबजावणी उपक्रमाचे आयोजन परिवहन विभागामार्फत करण्यात आले आहे.
