पुणे, ता.०५ : पुणे विमानतळ येथे नवे टर्मिनल सुरू होणार आहे. येथून देशांतर्गत प्रवासी विमान वाहतूकीच्या गरजेनुसार आवश्यक सुविधा उपलब्ध होणार आहे. त्यामुळे आंतरराष्ट्रीय विमान वाहतूकीच्यादृष्टीने धावपट्टीची लांबी वाढविण्यासाठी सर्व पैलूंचा अभ्यास करण्याची गरज आहे. असे मत राज्याचे उच्च व तंत्रशिक्षण मंत्री चंद्रकांत पाटील व्यक्त केले.
पुणे विमानतळ येथे नुकतेच आढावा बैठकीचे आयोजन करण्यात आले होते. यावेळी बोलताना चंद्रकांत पाटील यांनी वरील मत व्यक्त केले. यावेळी यावेळी विभागीय आयुक्त सौरभ राव, पोलीस आयुक्त रितेश कुमार, जिल्हाधिकारी डॉ. राजेश देशमुख, पुणे महानगर प्रदेश विकास प्राधिकरण आयुक्त राहुल महिवाल, पुणे महानगरपालिकेचे अतिरिक्त आयुक्त विकास ढाकणे, भारतीय विमानपत्तन प्राधिकरणाचे पुणे विमानतळ व्यवस्थापक संतोष ढोके आदी मान्यवर उपस्थित होते.
पुढे बोलताना पाटील म्हणाले, भविष्याच्यादृष्टीने आंतरराष्ट्रीय विमान वाहतूक वाढविण्यासाठीही प्रयत्न करावे लागतील. त्यादृष्टीने आवश्यक अभ्यास करण्यात यावा. पुरंदर विमानतळाच्या कामाला गती देण्याबाबत लवकरच मुख्यमंत्री आणि उपमुख्यमंत्र्यांच्या उपस्थितीत बैठक घेण्यात येईल. तसेच नव्या टर्मिनलसाठी आवश्यक रस्त्याच्या कामालाही गती द्यावी असे निर्देश ही देण्यात आले.
पुणे विमानतळ येथून दररोज सुमारे ३० हजार प्रवासी प्रवास करतात, त्यातील सुमारे ५४० आंतरराष्ट्रीय प्रवासी आहेत. २०२२-२३ मध्ये ५९ हजार ४५१ विमानफेऱ्यांद्वारे ८० लाख प्रवाशांनी विमानसेवेचा लाभ घेतला आहे. या वर्षी सप्टेंबरपर्यंत ३१ हजार ५९१ विमानफेऱ्यांद्वारे ४७ लाखाहून अधिक प्रवाशांनी प्रवास केला आहे. नवे टर्मिनल सुरू झाल्यावर ही संख्या दुपटीने वाढण्याची शक्यता आहे.
संतोष ढोके (व्यवस्थापक – पुणे विमानतळ)
