पुणे: महाराष्ट्र ऑलिम्पिक असोसिएशनच्या 2 ऑक्टोबर 2025 रोजी (MCA Election) झालेल्या निवडणुकीत (Ajit Pawar) उपमुख्यमंत्री अजित पवार (Murlidhar Mohol) यांची पुन्हा अध्यक्षपदी (Pune News) आणि केंद्रीय राज्यमंत्री मुरलीधर मोहोळ यांची वरिष्ठ उपाध्यक्षपदी बिनविरोध निवड झाल्याची घोषणा करण्यात आली होती. मात्र आता काही क्रीडा संघटनांनी ही निवडणूकच बेकायदेशीर असल्याचा आरोप करत न्यायालयात धाव घेतली आहे. या प्रकरणामुळे महाराष्ट्रातील क्रीडा क्षेत्रात मोठी चर्चा सुरू झाली आहे.
महाराष्ट्र सायकलिंग असोसिएशनचे सचिव सूर्यकांत पवार यांनी पुण्यात पत्रकार परिषद घेऊन धर्मादाय आयुक्तालयाचा निकाल सादर केला आणि MOA मधील ही निवड पुर्णपणे नियमबाह्य असल्याचा दावा केला. त्यांच्या म्हणण्यानुसार मतदान न घेता थेट बिनविरोध निवड जाहीर करण्यात आली, जी प्रक्रिया स्वतःच चुकीची आहे. या निवडीविरोधात सायकलिंग असोसिएशन, हॉकी महाराष्ट्र, महाराष्ट्र जलतरण संघटना यांसारख्या अनेक संघटना एकत्र आल्या आहेत. सूर्यकांत पवार यांनी या संदर्भात मुंबई हायकोर्टात याचिकाही दाखल केली आहे. त्यांचा दावा आहे की कोर्टाची सुनावणी झाल्यानंतर MOA ला पुन्हा संपूर्ण निवडणूक प्रक्रिया राबवावी लागू शकते.
या सर्व वादाच्या पार्श्वभूमीवर अजित पवार यांनी 23 नोव्हेंबर रोजी MOA ची वार्षिक सर्वसाधारण सभा बोलावली आहे. मात्र धर्मादाय आयुक्तालयाचा निकाल आणि न्यायालयीन प्रक्रिया लक्षात घेता ही सभा देखील बेकायदेशीर ठरू शकते, असा विरोधकांचा आरोप आहे.
हॉकी महाराष्ट्रचे सहसचिव रणवीरसिंह यांनी सांगितले की क्रीडा लवादाच्या नियमांनुसार एखाद्या व्यक्तीला केवळ दोन कार्यकाळ अध्यक्ष किंवा पदाधिकारी म्हणून काम करता येते. पण अजित पवार हे चौथ्यांदा अध्यक्ष झाले आहेत, जे थेट नियमभंग आहे. याशिवाय मागील 10 ते 12 वर्षांत MOA मध्ये 12 कोटींपेक्षा जास्त आर्थिक अनियमितता झाल्याचेही आरोप होत आहेत.
सध्या अजित पवार आणि मुरलीधर मोहोळ यांचा नवीन कार्यकाळ सुरू झाला असला तरी संपूर्ण प्रकरण आता न्यायालयाच्या पुढील तारखेवर अवलंबून आहे. जर निकाल विरोधात गेला तर दोघांनाही पद सोडावे लागण्याची शक्यता अधिक आहे.
