पुणे : पुण्यात अंगारकी चतुर्थी २०२५ निमित्त श्रीमंत दगडूशेठ हलवाई गणपती मंदिरात दर्शनासाठी येणाऱ्या भाविकांच्या गर्दीमुळे वाहतूक व्यवस्थेत मोठे बदल करण्यात आले आहेत. मंगळवार, (१२ ऑगस्ट २०२५) मध्यवर्ती पुणे परिसरात वाहतूक कोंडी टाळण्यासाठी आणि भाविकांना सुलभ दर्शन घडवण्यासाठी पुणे वाहतूक पोलिसांनी विशेष नियोजन केले आहे.
मंगळवारी आप्पा बळवंत चौकाकडून बुधवार चौकाकडे जाणारा मुख्य रस्ता संपूर्ण दिवसासाठी बंद ठेवण्यात येणार आहे. तसेच श्रीमंत दगडूशेठ गणपतीकडे जाणाऱ्या मार्गांपैकी बाजीराव रोड आणि शिवाजी रोडही मंगळवारी दिवसभर वाहतुकीसाठी बंद ठेवण्याचा निर्णय घेण्यात आला आहे. या रस्त्यांऐवजी पर्यायी मार्गाचा वापर करण्याचे आवाहन नागरिकांना करण्यात आले आहे. या चौकात गर्दी टाळण्यासाठी पोलिसांचा मोठा ताफा देखील तैनात करण्यात येणार आहे.
नागरिक पर्यायी मार्ग म्हणून पुरम चौकातून शिवाजीनगरकडे जाणाऱ्या वाहनचालकांनी जे एम रोडमार्गे पुढे जाण्याचा सल्ला पोलिसांनी दिला आहे. तसेच शिवाजी रोडवरून स्वारगेटकडे जाणाऱ्या वाहनचालकांनी टिळक रोड मार्गाचा वापर करावा. वाहतूक पोलिसांनी या बदलांची माहिती सोशल मीडियावर शेअर करत दिली आहे.
