विशाल कदम
Loni Kalbhor : लोणी काळभोर : पुणे-सोलापूर राष्ट्रीय महामार्गावरील लोणी काळभोर (ता. हवेली) ग्रामपंचायत हद्दीतील लोणी कॉर्नरजवळ टेम्पो व पिकअपचा अपघात झाला. या अपघातात टेम्पोमधील विटा महामार्गावर पडल्याने काही काळ वाहतूक कोंडी झाली होती. हा अपघात रविवारी (ता.१) दुपारी एक वाजण्याच्या सुमारास झाला. रस्त्यावर विटा पडल्याने जेसीबीच्या सहाय्याने तत्काळ विटा हटवण्यात आल्या. त्यानंतर वाहतूक पूर्ववत झाली.
View this post on Instagram
काही काळ वाहतूक कोंडी
याबाबत मिळालेल्या माहितीनुसार, लोणी काळभोर येथील व्यंकटेश जॉयनेस्ट इमारतीच्या दिशेकडून एक पिकअप रस्ता ओलांडून सोलापूरच्या दिशेने वळणार होता. त्याचवेळी पुण्याकडून सोलापूरच्या दिशेने विटा भरून घेऊन चाललेल्या टेम्पोचालकाला अचानक रस्त्यातच पिकअप दिसला. त्यानंतर टेम्पो चालकाने ब्रेक दाबण्याचा प्रयत्न केला. मात्र, चालकाचा टेम्पोवरील ताबा सुटला आणि टेम्पोने पिकअपला पाठीमागून धडक दिली. त्यानंतर टेम्पो दुभाजकावर जाऊन पलटी झाला. (Loni Kalbhor ) टेम्पोमधील विटा रस्त्यावर पडल्याने पुण्याहून सोलापूरच्या दिशेने जाणारा महामार्ग बंद झाला होता. यामुळे काही काळ वाहतूक कोंडी झाली होती. तर या अपघातात पिकअपचेही मोठ्या प्रमाणात नुकसान झाले.
दरम्यान, या घटनेची माहिती मिळताच, लोणी काळभोर येथील युवक प्रसाद कुंजीर, उमेश काटवटे, विशाल चौधरी, अनिकेत कुलकर्णी, निशाद जगताप यांनी समयसूचकता दाखवून, महामार्गावर पडलेल्या विटा बाजूला जेसीबीची व्यवस्था केली. (Loni Kalbhor ) तर तुषार राहिंज यांनी विनाशुल्क जेसीबीच्या सहाय्याने रस्त्यावरील विटा एका बाजूला काढल्या.
लोणी काळभोर वाहतूक शाखेचे पोलीस उपनिरीक्षक रामदास जाधव व त्यांचे सहकारी तातडीने घटनास्थळी दाखल झाले. रस्त्यावरील विटा बाजूला केल्यानंतर वाहतूक पोलिसांनी पुणे-सोलापूर महामार्गावर झालेली वाहतूक कोंडी सुरळीत केली.
