लोणी काळभोर, ता. 14 : वाघोली (ता. हवेली) परिसरात लॅपटॉप चोरून पळून चाललेल्या एका अट्टल चोरट्याला लोणी काळभोर पोलिसांनी कुंजीरवाडी (ता. हवेली) येथील चिंतामणी पार्क प्लॉटींगजवळ बुधवारी (ता. 13 ) मोठ्या शिताफीने अटक केली आहे. सागर नागराज (वय 31 वर्षे, रा. महादनुर, ता. अंबुर, जि. वेल्लुर, राज्य तामिळनाडु) असे अटक करण्यात आलेल्या आरोपीचे नाव आहे. त्याच्याकडून 1 लाख 95 हजार 421 रुपये किंमतीचे 5 लॅपटॉप हस्तगत करण्यात लोणी काळभोर पोलिसांना यश आले आहे.
लोणी काळभोर पोलिस ठाण्याचे वरिष्ठ पोलिस निरीक्षक राजेंद्र पन्हाळे यांनी दिलेल्या माहितीनुसार, तपास पथकातील पोलिस अंमलदार चक्रधर शिरगिरे व शैलेश कुदळे हे पोलिस ठाण्याच्या हद्दीत गस्त घालत होते. गस्त घालत असताना पोलिसांना कुंजीरवाडी येथील चिंतामणी पार्क प्लॉटींगजवळ एक इसम संशयीतरित्या उभा असून त्याच्या पाठीवर काळ्या रंगाची जड वजनाची बॅग अडकवली आहे. अशी माहिती पोलिसांना एका खबऱ्यामार्फत मिळाली होती.
मिळालेल्या माहितीच्या अनुषंगाने पोलिसांचे पथक आरोपीला पकडण्यासाठी सदर ठिकाणी गेले होते. तेव्हा आरोपीला पोलिस आल्याची चाहुल लागल्याने तो तेथुन पळुन जाऊ लागला. मात्र लोणी काळभोर पोलिसांनी पाठलाग करून आरोपीला मोठ्या शिताफीने ताब्यात घेतले आहे. आरोपीची झडती घेतली असता, त्याच्या बॅगमध्ये चोरीचे 5 लॅपटॉप मिळुन आले. आरोपी सागर नागराज याला ताब्यात घेऊन लोणी काळभोर अधिक चौकशी केली असता, आरोपीने वाघोली येथून मंगळवारी (ता.12 ) पहाटे 5 लॅपटॉप चोरी केल्याची पोलिसांना कबुली दिली आहे. याप्रकरणी आरोपीच्या विरोधात वाघोली पोलिस ठाण्यात भारतीय न्याय संहिता कलम 305 (अ) अन्वये गुन्हा दाखल करण्यात आला आहे.
सदरची उत्कृष्ठ कामगिरी पोलीस उप आयुक्त, डॉ. राजकुमार शिंदे, सहाय्यक पोलीस आयुक्त, अनुराधा उदमले यांच्या मार्गदर्शनाखाली वरिष्ठ पोलीस निरीक्षक राजेंद्र पन्हाळे, पोलीस निरीक्षक (गुन्हे) स्मिता पाटील, सहाय्यक पोलीस निरीक्षक कृष्णा बाबर, पोलिस हवालदार गणेश सातपुते, रामहरी वणवे, तेज भोसले, अण्णा माने, संभाजी देवीकर, बापूसाहेब वाघमोडे, पोलिस अंमलदार चक्रधर शिरगिरे, शैलेश कुदळे, बाजीराव विर, योगेश पाटील, सूरज कुंभार, प्रदीप गाडे, राहुल कर्डीले, सचिन सोनवणे, प्रवीण धडस यांनी केली आहे.
