पुणे: श्रीमंत होण्याच्या स्वप्नाने अनेक तरुणांना फसवणूक करणाऱ्या गेमिंग ॲप्सच्या जाळ्यात अडकवले आहे. पुण्यात राहणाऱ्या 25 वर्षीय ओंकार राऊत नावाच्या तरुणासोबत अशीच एक धक्कादायक घटना घडली आहे. ‘ड्रीम११’ (Dream11) सारख्या गेमिंग ॲपवर तो तब्बल 80 लाख रुपये हरला आहे, ज्यामुळे तो आर्थिक संकटात सापडला आहे. समोर आलेल्या माहितीनुसार, ड्रीम११ गेमच्या आहारी गेल्यामुळे आर्थिक संकटातून बाहेर पडता न आल्याने ओंकारच्या एका मित्राने तर आत्महत्या केल्याचेही समोर आले आहे.
कोट्याधीश होण्याच्या स्वप्नाने जीवन उध्वस्त
ओंकार राऊतचा स्वतःचा सलूनचा व्यवसाय होता आणि तो त्यात यशस्वी होता. एका ग्राहकाने त्याला ‘ड्रीम११’ ॲपबद्दल सांगितले. सुरुवातीला 49 रुपयांच्या छोट्या पैजांपासून सुरुवात झाली, पण हळूहळू ही सवय व्यसनात बदलली. ओंकारने 1000 ते 1500 रुपये एका दिवसात लावण्यास सुरुवात केली. आपले पैसे संपल्यानंतर त्याने खासगी सावकारांकडून 20 टक्के व्याजाने कर्ज घेतले. तो गेमच्या आहारी गेला आणि पैसे उसने घेण्याचे हे चक्र सुरू झाल्यावर त्याला स्वतःचे सलूनचे दुकानही विकावे लागले. जाहिरात पाहिली काही लोक १ कोटी रुपये जिंकले. ते पाहून अडकत गेलो. त्याने पुढे सांगितले कि, आज तो इतरांच्या सलूनमध्ये काम करत आहे.
गेम बद्दल सांगतांना ओंकार म्हणाला की, “माझ्यासारखेच माझे 5 ते 6 मित्र यात अडकले. त्यांनी 30 लाख, 50 लाखांपर्यंत कर्ज घेतले. यातून विजय जगताप नावाच्या माझ्या एका मित्राने तर आत्महत्या केली. त्याने 15 लाख रुपये लावले होते. कसे फेडायचे या विवंचनेत त्याने हे पाऊल उचलले.” दरम्यान, ॲपमध्ये अनेक लोक करोडपती झाल्याची जाहिरात दाखवली जाते, पण जे हरतात त्यांची व्यथा कोणीच दाखवत नाही, असे ओंकारने सांगितले आहे.
ओंकारची सरकारला विनंती
गेमिंग ॲप्समुळे अनेक लोकांचे जीवन उद्ध्वस्त झाले आहे, त्यामुळे ही ॲप्स बंद करण्यात यावीत अशी ओंकारची मागणी आहे. मी मेहनत करून सगळ्यांचे पैसे परत देईन.” असेही तो म्हणाला आहे.
