खेड (पुणे): शिवसेनेच्या शिंदे गटाचे शिवसंकल्प अभियान सुरु झाले असून शनिवारी (६ डिसेंबर) खेड येथे कार्यकर्ता मेळावा पार पडला. यावेळी कार्यकर्त्यांना संबोधित करताना मुख्यमंत्री एकनाथ शिंदे म्हणाले, आपल्या पक्षात सातत्याने इनकमिंग सुरु आहे. शुक्रवारी (५ डिसेंबर) परभणीतील ५० नगरसेवकांनी आपल्या पक्षात प्रवेश केला. मुंबईत रोज प्रवेश सुरु आहेत. हजारो लोकप्रतिनिधी, शिवसैनिक मोठ्या विश्वासाने शिवसेनेचा भगवा खांद्यावर घेत आहेत. लोकांच्या आपल्याकडून खूप मोठ्या अपेक्षा आहेत. लोकांचा हा विश्वास सार्थ करण्याचं काम एकनाथ शिंदे केल्याशिवाय राहणार नाही, असंही ते म्हणाले.
मुख्यमंत्री एकनाथ शिंदे म्हणाले, सत्तेचा लोभ मनात ठेवून काहीजण पक्ष सोडतात. मात्र, मी सत्तेचा लोभ मनात ठेवून हा निर्णय घेतला नव्हता. मी अतिशय प्रामाणिकपणे केवळ पक्ष वाचवण्यासाठी आणि शिवसेनेचं खच्चीकरण थांबवण्यासाठी भूमिका घेतली. मला एवढंच सांगायचं आहे की, मला कधीही पदाचा, सत्तेचा मोह नव्हता, आताही ही नाही. त्यावेळी मी नगरविकास खात्याचा मंत्री होतो. माझ्याबरोबर सात-आठ मंत्री होते. आम्ही सर्वानी सत्तेवर लाथ मारली. केवळ बाळासाहेब ठाकरे यांची शिवसेना टिकवण्यासाठी हे सगळं केलं. बंड करायचंच असतं तर आम्ही ते २०१९ लाच केलं असतं. मी बाळासाहेबांचा शिवेसैनिक आहे, आनंद दिघेंचा कार्यकर्ता आहे.
एकनाथ शिंदे म्हणाले, “२०१९ ला खोटं बोलून भाजपाबरोबरची नैसर्गिक युती तोडली होती. त्यमुळे बंडाचा निर्णय तेव्हाच घेतला असता तर शिवसेना रसातळाला गेली असती. म्हणून आम्ही तेव्हा तसा निर्णय घेतला नाही.” १९९५ ला शिवसेनेची पहिल्यांदा सत्ता आली तेव्हा बाळासाहेब ठाकरे यांना वाटलं असतं तर ते तेव्हाच मुख्यमंत्री झाले असते. परंतु, यावेळी सत्ता येताच हे लगेच मुख्यमंत्री झाले, असं वक्तव्य करत एकनाथ शिंदे यांनी ठाकरे गटाचे प्रमुख उद्धव ठाकरेंवर निशाणा साधला.
