कुणाल गावडे
कुरकुंभ: जनावरांच्या गोठ्यातील दोन लहान (Daund Leopard Attack) वासरांवर बिबट्याने हल्ला (Daund News) केल्याची घटना घडली आहे. ही घटना कुरकुंभ (ता.दौंड) ग्रामपंचायत हद्दीतील म्हेत्रे वस्ती परिसरात सोमवारी (ता.10) घडली आहे. बिबट्याच्या हल्ल्यात दोन्ही वासरांचा जागीच मृत्यू झाला आहे. बिबट्यांची वाढती संख्या, बिबट्यांचे पशुधनावरील आणि मानवी हल्ले यामुळे परिसरात घबराहटीचे वातावरण पसरले आहे.
मनोहर म्हेत्रे असे नुकसानग्रस्त शेतकऱ्याचे नाव आहे. यात शेतकऱ्याचे आर्थिक नुकसान झाले आहे. या घटनेची माहिती मिळताच, कुरकुंभचे वनरक्षक गोकुळ गवळी हे तातडीने घटनास्थळी दाखल झाले. घटनास्थळाचा अहवाल तयार करून कार्यालयाला पाठविला आहे.
अचानक बिबट्या समोर आला तर शांत राहा घाबरू नका आणि पळून जाण्याचा प्रयत्न करू नका. पळाल्याने बिबट्याचे लक्ष वेधले जाऊ शकते. बिबट्याशी डोळ्याचा संपर्क साधा आणि त्याला हटविण्याचा प्रयत्न करा. त्याला पाठ दाखवू नका. स्वतःला मोठे दिसण्याचा प्रयत्न करा. हात वर उचला किंवा काही वस्तू हातात घेऊन स्वतःला बिबट्यापेक्षा उंच असल्याचे भासवा. जोरात ओरडून किंवा शिट्टी वाजवून आवाज करा. मोठ्याने गाणे, संगीत लावा.
दरम्यान, बिबट्याने हल्ला केल्यास तीक्ष्ण वस्तू, दगड, काठी किंवा इतर कोणत्याही उपलब्ध वस्तूने त्याला मारण्याचा प्रयत्न करा. बिबट्या मानेला धरून शिकार करतो. अशावेळी आपल्या मानेभोवती जाड कपडा गुंडाळावा.शक्यतो, नागरिकांनी रात्रीच्या वेळी एकटे फिरू नये. आपली व आपल्या कुटुंबाची काळजी घ्या. बिबट्याची चाहूल लागताच तत्काळ वन विभागाला संपर्क साधावा. असे आवाहन वनविभागाकडून करण्यात आले आहे.
