Crime News : सोलापूर : सोलापूर जिल्ह्यातील माढा तालुक्यातील रुई गावात धक्कादायक घटना घडली असून एका वडिलांनी आपल्या 25 वर्षांच्या मुलाची हत्या (Murder) केल्याने परिसरात खळबळ उडाली आहे. विश्वजीत उर्फ पिलो राजेंद्र पतंगे असे मृत तरुणाचे नाव असून राजेंद्र भानुदास पतंगे असे आरोपी वडिलांचे नाव आहे. टेंभुर्णी पोलिसांनी आरोपीला तातडीने ताब्यात घेतले आहे.
मिळालेल्या माहितीनुसार, पतंगे कुटुंब हे अल्पभूधारक शेतकरी आहे. शुक्रवारी 27 तारखेला दुपारी विश्वजीत आणि त्याचे वडील राजेंद्र यांच्यात शेताला पाणी देण्याच्या कारणावरून वाद झाला होता. या वादात दोघांमध्ये जोरदार बाचाबाची झाली. यावेळी विश्वजीतने वडिलांशी वाद घालताना शिवीगाळ केल्याचे समोर आले आहे. याआधीही मुलाकडून मारहाण झाल्याची नाराजी वडिलांच्या मनात होती.
रात्री सुमारे 11 वाजता विश्वजीत घरात झोपलेला असताना राजेंद्र पतंगे यांनी लोखंडी गजाने त्याच्यावर हल्ला केला. झोपेत असलेल्या मुलाच्या डोक्यावर आणि तोंडावर त्यांनी जोरदार प्रहार केले. हा हल्ला इतका गंभीर होता की, विश्वजीतचा जागीच मृत्यू झाला.
ही घटना पाहून आई राजश्री पतंगे हादरल्या. त्यांनी तातडीने टेंभुर्णी पोलीस ठाण्यात जाऊन पतीविरुद्ध फिर्याद दिली. आईनेच पतीविरोधात तक्रार केल्याने परिसरात मोठी चर्चा सुरू झाली आहे.
घटनेची माहिती मिळताच पोलिसांनी घटनास्थळी धाव घेत आरोपीला अटक केली. प्राथमिक तपासात जुन्या वादातून आणि रागातून हा प्रकार घडल्याचे समोर आले आहे. या घटनेमुळे गावात हळहळ व्यक्त केली जात आहे.
