पुणे: घरची परिस्थिती अत्यंत (Chandrakant Patil) कठीण असतानाही जिद्द, चिकाटी आणि (Pune News) कठोर परिश्रमाच्या बळावर बहरिन येथे झालेल्या आशियाई क्रीडा स्पर्धांमध्ये भारतासाठी सुवर्णपदक जिंकणाऱ्या सनी फुलमाळीच्या (Sunny Fulmali) आयुष्यात आता आमूलाग्र बदल झाला आहे. लोहगावमधील पालावर राहून कुस्ती क्षेत्रात सुवर्ण कामगिरी करणाऱ्या सनी फुलमाळीचे पालकत्व राज्याचे उच्च व तंत्रशिक्षण मंत्री चंद्रकांत पाटील यांनी स्वीकारले आहे. त्यांनी लोकसहभागातून सनीसाठी घर आणि सरावासाठी तालीम उभारण्याची, शिक्षणासाठी सर्वतोपरी मदत करण्याची आणि स्वतःच्या पगारातून दरमहा 50 हजार रुपये देण्याची घोषणा केली आहे.
ना. पाटील यांनी सनी फुलमाळी आणि त्याच्या कुटुंबाची लोहगावमधील पालावर भेट घेऊन त्याचे अभिनंदन केले आणि त्याच्या कामगिरीचे कौतुक केले. या वेळी सनीचे प्रशिक्षक वस्ताद सदाशिव राखपसरे, भाजप क्रीडा आघाडीचे प्रदेशाध्यक्ष संदीपआप्पा भोंडवे, माजी नगरसेवक बॉबी टिंगरे तसेच भागातील नागरिक आणि पालावरील बांधव उपस्थित होते.
सनीच्या कामगिरीचे कौतुक करताना चंद्रकांत पाटील म्हणाले की, “जिद्द आणि मेहनतीच्या बळावर सनीने मिळवलेले हे यश अत्यंत प्रेरणादायी आहे. डोक्यावर छप्पर नसतानाही पालावर राहून त्याने सुवर्ण पदक जिंकले, ही गोष्ट प्रत्येक तरुणासाठी प्रेरणादायी आहे. आज त्याने आई-वडिलांचे आणि आपल्या समाजाचे नाव उज्ज्वल केले आहे.”
ते पुढे म्हणाले, “सनीला लोकसहभागातून घर आणि कुस्तीच्या सरावासाठी तालीम बांधून दिली जाईल. शिक्षणासाठीही सर्वतोपरी मदत केली जाईल. माझ्या आणि पत्नीच्या उत्पन्नातून आम्ही सनीच्या उदरनिर्वाहासाठी दरमहा 50 हजार रुपये देऊ. त्याने आपले शिक्षण पूर्ण करून कुस्ती क्षेत्रावर लक्ष केंद्रित करावे आणि पुढील काळात ऑलिम्पिकमध्येही सुवर्णपदक मिळवावे,” अशी अपेक्षा त्यांनी व्यक्त केली.
या वेळी भटके विमुक्त विकास परिषद महाराष्ट्र प्रदेश संघटनेचे स्वामी धनगर, शरद माकर, किशोर शिंदे आणि अरविंद देवकर यांनी या विषयाकडे सरकारचे लक्ष वेधले होते. त्यामुळे सनी फुलमाळीचे कर्तृत्व प्रकाशझोतात आले आहे. त्याबद्दल परिषदेला धन्यवाद देत ना. पाटील म्हणाले की, “अशा सामाजिक कार्यांसाठी आम्ही संघटनेला नेहमी सर्व प्रकारची मदत करू.”
दरम्यान, चंद्रकांत पाटील यांनी आणखी एक महत्त्वपूर्ण घोषणा केली. “आंतरराष्ट्रीय आणि राष्ट्रीय स्तरावर पदक मिळवणाऱ्या खेळाडूंना शासकीय सेवेत सामावून घेण्याचा निर्णय माजी मुख्यमंत्री देवेंद्र फडणवीस यांच्या काळात झाला होता. मात्र तो निर्णय केवळ 17 वर्षांवरील खेळाडूंना लागू आहे. आता सनीच्या निमित्ताने 17 वर्षांखालील खेळाडूंनाही सरकारी नोकरीसाठी प्रोत्साहन मिळावे, यासाठी मी मुख्यमंत्र्यांकडे पाठपुरावा करणार आहे,” असेही त्यांनी स्पष्ट केले.
