Bhor : भोर तालुक्यातील कामथडी (ता. भोर) येथे राहत्या घरासमोर बसलेल्या तरुणांवर हाकी स्टिक, लोखंडी रॉड व लाकडी काठ्यांनी करण्यात आलेल्या भीषण मारहाणीत दोन तरुण गंभीर जखमी झाल्याची धक्कादायक घटना घडली आहे. भांडण सोडवण्यासाठी गेलेल्या एका महिलेलाही आरोपींनी अश्लील शिवीगाळ करत जीवे मारण्याची धमकी दिल्याचा आरोप असून, या घटनेमुळे संपूर्ण परिसरात तणावपूर्ण वातावरण निर्माण झाले आहे.
याबाबत मिळालेल्या माहितीनुसार, दिनांक १४ ऑक्टोबर २०२५ रोजी सायंकाळी सुमारे पाच वाजण्याच्या सुमारास सौ. तृप्ती सचिन इंगुळकर (वय ३८, रा. कामथडी, ता. भोर) या त्यांच्या राहत्या घरात असताना त्यांचा मुलगा निशीकांत इंगुळकर व त्याचे मित्र घरात बसले होते. याच वेळी सार्थक सुरेश वाल्हेकर याने आवाज देऊन निशीकांत व त्याच्या मित्रांना घराबाहेर बोलावले.
घरासमोर आल्यानंतर त्याच्यासोबत असलेले साहील बांदल, आकाश बांदल, रोहन इंगुळकर, गणेश वाल्हेकर तसेच इतर चार ते पाच इसम यांच्यासोबत सुरुवातीला बोलाचाली सुरू होती. मात्र काही क्षणातच हा वाद चिघळून अचानक मारहाणीचे रूप धारण झाले. आरोपींनी पूर्वनियोजितपणे आणलेल्या हाकी स्टिक, लोखंडी रॉड व लाकडी काठ्यांच्या साहाय्याने निशीकांत इंगुळकर व त्याच्या मित्रांवर बेदम हल्ला केला.
या हल्ल्यात निशीकांत इंगुळकर याच्या कानाच्या पाठीमागे जोरदार मार लागल्याने मोठ्या प्रमाणात रक्तस्राव झाला. त्याला वाचवण्यासाठी गेलेल्या गणेश धाडवे याच्या डोक्यावर साहील बांदल याने लोखंडी रॉडने वार केल्याने तो गंभीर जखमी झाला. याशिवाय घनश्याम कोडे, दिपक इंगुळकर, सॅन्डी वाल्हेकर व अमर शेलार यांनाही मारहाण करण्यात आल्याचे सांगण्यात येत आहे.
मारहाणीचा प्रकार सुरू असताना सौ. तृप्ती इंगुळकर यांनी भांडण सोडवण्याचा प्रयत्न केला असता आरोपींनी त्यांच्याशी अश्लील भाषेत शिवीगाळ करत जीवे मारण्याची धमकी दिली. महिलेलाही धमकावण्यात आल्याने परिसरातील नागरिकांमध्ये संतापाची भावना व्यक्त होत आहे.
घटनेनंतर जखमींना उपचारासाठी तातडीने रुग्णालयात दाखल करण्यात आले. या प्रकारामुळे कामथडी गावात भीतीचे वातावरण पसरले असून, नागरिकांकडून आरोपींवर कठोर कारवाईची मागणी केली जात आहे.या संपूर्ण घटनेचा पुढील तपास राजगड पोलीस स्टेशन करत आहे. (Bhor)
