पुणे : राष्ट्रवादी काँग्रेसचे नेते आणि मंत्री धनंजय मुंडे यांचे जवळचे सहकारी बजरंग सोनवणे यांनी बुधवारी राष्ट्रवादी काँग्रेस शरदचंद्र पवार पक्षात प्रवेश केला आहे. राष्ट्रवादी काँग्रेसचा राजीनामा दिल्यानंतर बजरंग सोनवणे हे अजित पवारांची साथ सोडत शरद पवार यांच्या गटात सहभागी झाले आहेत. शरद पवार यांचा निर्णय मान्य करून पक्ष देईल, तो उमेदवार विजयी करू असा निर्धार बजरंग सोनवणे यांनी यावेळी व्यक्त केला.
पक्ष प्रवेश झाल्यानंतर बजरंग सोनवणे यांनी म्हटले की, पवार साहेबांच्या पक्षात प्रवेश झाला, हे माझे भाग्य आहे. मूळ राष्ट्रवादी काँग्रेस स्थापन झाल्यापासून मी कार्यकर्ता आहे. पवार साहेब यांचे मन मोठं असल्यानेच त्यांनी मला पुन्हा संधी दिली आहे. तसेच पाहिजे तो सन्मान आपल्याला मिळत नाही, अशी कार्यकर्त्यांची भावना आहे. त्या भावनेचा सन्मान राखण्यासाठी मी आज तुमच्यासोबत आलो आहे, असंदेखील सोनावणे यांनी म्हटलं आहे.
