पुणे : वडगावजवळील नवले ब्रिज येथे सातत्याने अपघाताच्या घटना घडत असतात. नवले ब्रिजवर गुरुवारी (ता. २५) रात्री बाराच्या सुमारास रस्ता ओलांडणाऱ्या तरुणाला भरधाव वेगातील ट्रकने धडक दिल्याने झालेल्या अपघातात तरुणाचा मृत्यू झाला. याप्रकरणी ट्रक चालकाला सिंहगड रोड पोलिसांनी अटक केली आहे.
श्रीकांत बाबाराव वानखेडे (वय-३४, रा. आंबेगाव कात्र बायपास) असे मृत्यू झालेल्या युवकाचे नाव आहे. याप्रकरणी पोलिसांनी ट्रकचालक इस्माईल उस्मान बंडुवाले (वय-३०, रा. आलुरता, उमरगा, उस्मानाबाद) याच्यावर गुन्हा दाखल करुन अटक केली आहे. याबाबत सुदर्शन उत्तेश्वर मुंडे (वय-३४, रा. विघ्नहर्ता वास्तू, आंबेगाव पठार) यांनी सिंहगड रोड पोलीस ठाण्यात फिर्याद दिली आहे.
या अपघाताबाबत पोलिसांनी दिलेल्या माहितीनुसार, आरोपी कात्रजकडून येणाऱ्या रस्त्यावर विरुद्ध दिशेने भरधाव वेगात ट्रक घेऊन येत होता. नवले ब्रिज येथील सिग्नलजवळ श्रीकांत वानखेडे हा रस्ता ओलांडत असताना समोरून येणाऱ्या ट्रकची त्याला जोरदार धडक बसली. यामध्ये तो गंभीर जखमी झाला. त्यातच त्याचा मृत्यू झाला. दरम्यान, घटनेची माहिती मिळताच सिंहगड पोलिसांनी घटनास्थळी धाव घेतली. ट्रकचालकाला ताब्यात घेतले.
