पुणे : पुण्यातील खेडमध्ये आंतरजातीय प्रेमविवाह केल्याच्या रागातून आईने मुलीच्या नवऱ्याला भररस्त्यात बेदम मारहाण केल्याची व मुलीचे अपहरण केल्याची धक्कादायक घटना समोर आली आहे. या घटनेने परिसरात एकच खळबळ उडाली आहे. या घटनेचा एक व्हिडिओ देखील सोशल मीडियावर मोठ्या प्रमाणात व्हायरल होत आहे.
नेमकं प्रकरण काय?
मिळालेल्या माहितीनुसार, विश्वनाथ गोसावी आणि त्याची बायको प्राजक्ता (वय २८) गोसावी यांनी काही दिवसांपूर्वीच लग्न केले आहे. प्राजक्ता हिने विश्वनाथ सोबत पळून जाऊन लग्न केल्याने समाजात आपली नाक कापल्याच्या रागातून मुलीच्या आईने आणि तिच्या भावाने मुलीचे अपहरण करत तिच्या नवऱ्याला म्हणजेच विश्वनाथ बेदम मारहाण केली.
हे सगळं भरचौकात घडलं असल्याने उपस्थितांनी मोबाईलमध्ये हा प्रकार रेकॉर्ड केला आणि सोशल मीडियावर शेअर केला. हा व्हिडिओ सध्या मोठ्या प्रमाणात व्हायरल होत असून, खेड पोलिस ठाण्यामध्ये मुलीची आई आणि भाऊ यांच्यासह १५ जणांविरोधात अपहरण व जबर मारहाण प्रकरणी गुन्हा दाखल करण्यात आला आहे. पोलीस सध्या या प्रकरणाचा तपास करत आहेत.
