पिंपरी : किरकोळ कारणावरून गंभीर गुन्हे घडण्याच्या प्रमाणात वाढ होत आहे. काही दिवसांपूर्वी झालेल्या भांडणाच्या रागातून तिघांनी एका महिलेला शिवीगाळ करुन मारहाण केली. तसेच हातातील लोखंडी पंच डोक्यात मारुन गंभीर जखमी केल्याची घटना निगडी येथे घडली.
या प्रकरणी निगडी पोलिसांनी एका महिलेसह तिघांना अटक केली आहे. हा प्रकार बुधवारी (ता. २४) रात्री साडेनऊच्या सुमारास ओटास्किम निगडी येथे घडला. याबाबत एका महिलेने निगडी पोलीस ठाण्यात फिर्याद दिली आहे. यावरुन विकास उर्फ सोन्या कमलाकर म्हस्के (वय-२१), प्रकाश उर्फ पक्या कमलाकर म्हस्के (वय-२०, दोघे रा. पंचशिल हौसिंग सोसायटी, निगडी) यांच्यावर गुन्हा दाखल करुन अटक केली आहे.
पोलिसांनी दिलेल्या माहितीनुसार, फिर्यादी व त्यांचे घरातील सदस्य खडकी येथील टपरीवर असताना आरोपी महिलेसोबत १५ जानेवारी रोजी भांडण झाले होते. याचा राग आरोपींच्या मनात होता. याच कारणावरुन आरोपींनी फिर्यादी यांच्या घरी येऊन त्यांना शिवीगाळ करुन मारहाण केली. तर आरोपी प्रकाश याने त्याच्या हातातील लोखंडी पंच फिर्यादी यांच्या डोक्यात मारुन गंभीर जखमी केले. यावेळी फिर्यादी यांचा मुलगा भांडण सोडवण्यासाठी आला असता आरोपींनी त्याला मारून टाकण्याची धमकी दिली.
