वारजे ( पुणे): वारजे परिसरातील रामनगर परिसरात छत्रपती शिवाजी महाराज चौकात नवीन सांडपाणी वाहिनी टाकण्यात आली आहे. परंतु जुनी सांडपाणी वाहिनी न काढता शेजारी नवीन सांडपाणी वाहिनी टाकण्यात आल्याचा खळबळजनक प्रकार समोर आला आहे. जुनी लाइन न काढल्याने सांडपाणी रस्त्यावर वाहत आहे. रस्त्यावर वाहणाऱ्या सांडपाण्याचा दुर्गंध परिसरात पसरला आहे. दरम्यान, नागरिक यामुळे त्रस्त असून या समस्येवर कधी तोडगा निघणार असा सवाल महापालिकेला करत आहे. रामनगर परिसरातील विविध ठिकाणी मार्च मध्ये महापालिकेच्या मुख्य खात्याकडून सांडपाणी वाहिन्यांची कामे करण्यात आली होती.
नवीन सांडपाणी वाहिनी योग्य पद्धतीने काम करत नसून जुन्या सांडपाणी वाहिनीमधून पाणी लीक होत असल्याच्या तक्रारी नागरिकांनी केल्या आहेत. ज्युनियर इंजिनिअर अमर साठे यांनी स्पष्ट केले की, जुनी सांडपाणी लाइन काढून टाकणे आव्हानात्मक होते कारण त्यावर पायऱ्या बांधण्यात आल्या होत्या. यावर उपाय म्हणून जुन्या लाइनचे पाणी पाईपद्वारे नवीन लाइनमध्ये वळवले जात आहे. अधिकाऱ्यांनी आवश्यक ठिकाणी चेंबर बांधण्याची आणि त्यानंतर काँक्रीटचा रस्ता करण्याची योजना आखली आहे. रहिवाशांनी अधिकाऱ्यांनी कामाची पाहणी करावी आणि समस्या सोडवण्यासाठी उपाययोजना कराव्यात अशी मागणी केली आहे.
