Pune Fire News : पुणे : रास्ता पेठ येथील ताराचंद रुग्णालयामधील विद्यार्थिनींच्या वसतिगृहाला आग लागल्याची घटना शुक्रवारी (ता. ३) सकाळी घडली. ही आग खोलीतील हिटरमुळे लागल्याचे प्रत्यक्षदर्शींनी सांगितले. अग्निशमन दलाची वाहने तत्काळ घटनास्थळी पोहोचल्यामुळे सुदैवाने या घटनेत कोणतीही जिवितहानी झाली नाही.
दहा मिनिटांत आग आटोक्यात
आगीच्या घटनेची माहिती मिळताच अग्निशमन मुख्यालय आणि कसबा अग्निशमन केंद्र येथून अग्निशमन वाहने रवाना करण्यात आली. तळमजला अधिक तीन मजले असलेल्या वसतिगृहात पहिल्या मजल्यावर चार क्रमांकाच्या खोलीमध्ये ही आग लागली. जवानांनी प्रथम विद्यार्थिनी सुरक्षित आहेत का, याची खात्री केली. या खोलीत राहत असलेल्या तीन विद्यार्थिनी आणि वसतिगृहातील सर्वजण बाहेर आले होते. दरम्यान, जवानांनी खोलीत पाणी मारून दहा मिनिटांत आग आटोक्यात आणली. या घटनेत खोलीमधील शैक्षणिक साहित्य, लाकडी सामान आणि वस्तू जळाल्या. ही आग खोलीतील हिटरमुळे लागल्याचे प्रत्यक्षदर्शींनी सांगितले.
