बापू मुळीक
सासवड: सासवड परिसरातील प्राचीन कुंजीरवाड्याजवळ हरवलेली पाच तोळे वजनाची सोन्याची माळ दोन चिमूकल्यांना सापडली असता सासवड पोलिसांकडे सुपूर्द केली. त्यानंतर पोलिसांनी खात्री पटवून मूळ मालकाला ही साडेचार लाख रुपयांची सोन्याची माळ परत केली आहे.
याबाबत सविस्तर माहिती अशी की, सासवड परिसरातील प्राचीन कुंजीरवाड्याजवळ सासवड नगरपालिकेचे माजी नगरसेवक जितेंद्र उर्फ (सोनू काका) जगताप यांचे घर आहे. सध्या शाळेला सुट्टी असल्यामुळे, त्यांच्या घरातील, वरून प्रदीप जगताप (वय 9) व शर्व राज महेंद्र जगताप ( वय 8 ) ही दोन चिमुकली मुले दुपारी घराबाहेर खेळत होती. खेळताना या मुलांना पिवळी चमकणारी माळ सापडली. कुतूहलाने त्यांनी ती माळ घेऊन घर गाठलेे. घरात आल्यावर त्यांनी जितेंद्र जगताप यांना आम्हाला ही माळ सापडल्याचे सांगितले. यावेळी ही माळ सोन्याची असावी असे त्यांना वाटले.
त्यानंतर खात्री करून त्यांनी त्वरित दोन्ही मुलांना घेऊन सासवड पोलीस स्टेशन गाठले. सोन्याची माळ पोलिसांच्या ताब्यात सुपूर्द केली. सासवड पोलीस स्टेशनचे सहाय्यक पोलीस निरीक्षक वैभव सोनवणे व पोलीस उपनिरीक्षक गणेश पाटील यांनी आपण हा सोन्याचा दागिना सापडल्याचे, सर्वत्र प्रसारित करून मालकांचा शोध घेऊ असे सांगितले.
मात्र, तोपर्यंत मेघा रमेश गायकवाड (रा. कात्रज पुणे) या कुंजीरवाड्याजवळ रस्त्यावर दागिना शोधण्यासाठी हिंडताना त्यांच्या कुटुंबीयांना दिसल्या. त्यानंतर त्यांना सासवड पोलीस ठाण्यात दागिना जमा केल्याची माहिती मिळाली. पोलीस ठाण्यात आल्यावर पोलिसांनी बिलाचा फोटो व सर्व खात्री केल्यावर सोन्याची माळ मेघा गायकवाड यांना परत केली.
