पुणे : पुणे पोलिसांनी अवैध ड्रग्ज विक्रीचे आंतरराष्ट्रीय रॅकेट उघड केल्यानंतर देशभरात त्यांचे कौतुक झाले. राज्याच्या गृहमंत्र्यांनी देखील पोलीस पथकाला २५ लाख रुपये बक्षीस जाहीर केले. या कारवाईनंतर पुणे पोलीस अॅलर्ट मोडवर आले आहेत. आता पोलिसांनी अवैध मद्य विक्रीवर करडी नजर वळवली आहे. पुणे ग्रामीण पोलिसांनी अवैध मद्यविक्री व्यवसायावर मोठी छापेमारी केली आहे. शहराजवळ तब्बल ९ हजार लिटर दारू जप्त केली आहे. उरुळी कांचन येथे पोलिसांची ही मोठी कारवाई केली आहे.
ड्रग्स कारवाईनंतर आता पोलिसांनी अवैध मद्य विक्रीवर नजर वळवली आहे. ग्रामीण पोलिसांनी सोरतापवाडीजवळ हातभट्टीवर छापा टाकला. या छाप्यात सुमारे ९ हजार लिटर हातभट्टी दारू जप्त केली. सोरतापवाडी भागात २ ठिकाणी पोलिसांनी छापा टाकला. एका कारवाईत पोलिसांनी जप्त केली ५२५ लिटर दारू तर दुसऱ्या कारवाईत ९ हजार लिटर हातभट्टी दारूचे कंटेनर जप्त केले आहेत. पोलिसांनी छापेमारी करत दारू तयार करण्यासाठी लागणारे ५ हजार लिटर रसायन देखील जप्त केले आहे.
आगामी लोकसभा निवडणुका २०२४ च्या अनुषंगाने अवैध दारू निर्मिती, वाहतूक आणि विक्रीवर आळा घालण्यासाठी राज्य उत्पादन शुल्क पुणे विभागीय भरारी पथकाने जिल्ह्यात सहा गावांत छापे टाकत ९९५ लीटर गावठी हातभट्टी दारूसह ७ लाख ९० हजार ५५० रुपये किंमतीचा मुद्देमाल जप्त केला होता.
भरारी पथकाने १३ फेब्रुवारी आणि १४ फेब्रुवारी या दोन दिवसात सोरतापवाडी, शिंदवणे, गाडामोडी, डाळींब, राजेवाडी आणि आंबळे या ठिकाणी छापे टाकले. या कारवाईत ५ वारस आणि ३ बेवारस अशा ८ गुन्ह्यांची नोंद करून ९९५ लिटर गावठी हातभट्टी दारू, २५ हजार लिटर रसायन, ३ दुचाकी वाहने आणि गावठी हातभट्टी दारू निर्मितीचे साहित्य, असा मुद्देमाल जप्त करण्यात आला होता.
पुणे जिल्ह्यातील गुन्हेगारी रोखण्यासाठी पुणे पोलिसांनी कंबर कसली आहे. गुन्हेगारीला आळा बसावा, यासाठी पुणे पोलीस आणि पुणे ग्रामीण पोलिसांकडून शर्थीचे प्रयत्न सुरु आहेत. त्यातच अशा प्रकारच्या छापेमारीमुळे गुन्हेगारी आणि अवैध विक्रीला आळा बसेल, अशी अपेक्षा नागरिकांकडून व्यक्त केली जात आहे.
