पुणे प्राईम न्यूज: दिल्ली दारू धोरण घोटाळ्यातील आरोपी माजी उपमुख्यमंत्री मनीष सिसोदिया यांच्या जामीन अर्जावर गुरुवारी (५ ऑक्टोबर) सर्वोच्च न्यायालयात सुनावणी झाली. यादरम्यान दिल्ली दारू घोटाळ्यात आम आदमी पार्टी (आप)ला आरोपी का बनवले नाही? या टिप्पणीचा मुद्दा सर्वोच्च न्यायालयात उपस्थित करण्यात आला. ईडीही आम आदमी पार्टीला आरोपी बनवण्याच्या तयारीत असल्याची माहिती समोर येत आहे. मात्र, हा प्रश्न का विचारला, हे न्यायालयाने सुनावणीदरम्यान सांगितले.
सुप्रीम कोर्टाने सुनावणीदरम्यान एक महत्त्वाची टिप्पणी केली आणि सांगितले की, आम्ही हे स्पष्ट करू इच्छितो की, आम्ही बुधवारी फक्त कायदेशीर प्रश्न विचारला होता. आमचा प्रश्न होता की, जर A आणि B ला आरोपी बनवले आहे. त्याचा फायदा C ला झाला आहे, तर मग त्याला आरोपी का करण्यात आले नाही. या सुनावणीदरम्यान सिसोदिया यांचे वकील अभिषेक मनु सिंघवी यांनी प्रश्न उपस्थित केला होता की, कोर्टाने आम आदमी पार्टीला आरोपी बनवण्यास सांगितले, असे मीडियामध्ये बोलले जात आहे.
जेव्हा सिसोदिया यांचे वकील अभिषेक मनु सिंघवी यांनी ‘आप’ला आरोपी बनवण्याचा मुद्दा उपस्थित केला, तेव्हा अंमलबजावणी संचालनालयाचे (ईडी) वकील अतिरिक्त सॉलिसिटर जनरल एसव्ही राजूही तेथे उपस्थित होते. कोणाच्या विरोधात पुरावे सापडले तर त्याला सोडले जाणार नाही, असे ते म्हणाले. बुधवारी सुनावणी झाली, तेव्हा सर्वोच्च न्यायालयाने अतिरिक्त सॉलिसिटर जनरल यांना यासंदर्भात प्रश्न विचारले होते. आपचे खासदार संजय सिंह यांना बुधवारीच दारू घोटाळ्याप्रकरणी अटक करण्यात आली.
सर्वोच्च न्यायालय काय म्हणाले?
बुधवारी सर्वोच्च न्यायालयाने ईडीला दारू घोटाळ्यातून आम आदमी पार्टीला कथित फायदा झाला आणि पैसे मिळाले की नाही, हे सांगण्यास सांगितले होते. मग ‘आप’ला प्रिव्हेन्शन ऑफ मनी लाँड्रिंग ऍक्ट (पीएमएलए) प्रकरणात आरोपी का करण्यात आले नाही? न्यायमूर्ती संजीव खन्ना आणि न्यायमूर्ती एसव्ही भाटी यांच्या खंडपीठाने सीबीआय आणि ईडीच्या वतीने उपस्थित अतिरिक्त सॉलिसिटर जनरल एसव्ही राजू यांना न्यायालयात हा प्रश्न विचारला.
खंडपीठाने विचारले, ‘पीएमएलएचा प्रश्न आहे, तुमचे संपूर्ण प्रकरण असे आहे की, गुन्ह्यातील पैसा राजकीय पक्षाकडे गेला. तो राजकीय पक्ष अजूनही आरोपी नाही. याचे उत्तर कसे देणार?’
सिसोदिया यांच्यावरील आरोप हे अफवावर आधारित : सिंघवी
दुसरीकडे, मनीष सिसोदिया यांच्या जामीन अर्जावर ज्येष्ठ वकील अभिषेक मनु सिंघवी यांनी युक्तिवाद केला. सिंघवी म्हणाले की, सिसोदिया यांना पैसे मिळाल्याचा कोणताही पुरावा नाही. जे आरोपी त्याच्या जवळचे असल्याचे सांगितले जात होते, तेही त्याच्या जवळचे नव्हते. सिंघवी यांनी असा युक्तिवाद केला की सिसोदिया यांच्यावर जे काही आरोप करण्यात आले आहेत, ते केवळ ऐकीव माहितीवर आधारित आहेत. या गोष्टी सिद्ध करण्यासाठी तपास यंत्रणांकडे कोणतेही पुरावे नाहीत.
