मुंबई : शिवसेना शिंदे गटाने काही दिवसांपूर्वीच लोकसभा उमेदवारांची पहिली यादी जाहीर केली होती. त्यामध्ये आठ उमेदवारांच्या नावांचा समावेश होता. हिंगोली लोकसभा मतदार संघातून हेमंत पाटील यांचे नाव जाहीर करण्यात आले होते. मात्र, आठवड्याभरातच आता शिंदे गटाने विद्यमान खासदार हेमंत पाटील यांची उमेदवारी रद्द केली आहे. त्यांच्याऐवजी जिल्हाप्रमुख बाबुराव कदम कोहळीकर यांना हिंगोलीचे तिकीट देण्यात आले आहे.
याबाबत मिळालेल्या माहितीनुसार, महायुतीकडून हिंगोली लोकसभेसाठी शिवसेना शिंदे गटाचे खासदार हेमंत पाटील यांना उमेदवारी देण्यात आली होती. हेमंत पाटील यांनी मतदारसंघात जोरदार प्रचार सुरू केला होता. मात्र, हेमंत पाटील यांच्या उमेदवारीला भारतीय जनता पक्षाकडून जोरदार विरोध केला जात होता. तसेच उमेदवारी बदलण्याची मागणीही भाजप पदाधिकाऱ्यांच्या बैठकीतून करण्यात आली होती.
या मागणीनंतर आता हेमंत पाटील यांची जाहीर झालेली उमेदवारी आठवड्याभरातच रद्द करण्यात आली आहे. त्यांच्याऐवजी आता बाबूराव कदम कोहळीकर यांना उमेदवारी देण्यात आली आहे. विशेष म्हणजे २६ एप्रिल रोजी हिंगोली मतदारसंघाचे मतदान पार पडणार असून त्यासाठी उमेदवारी अर्ज भरण्याची ४ एप्रिल ही शेवटची मुदत आहे. अर्ज भरण्याची मुदत संपण्याच्या एक दिवस आधी ठरलेला उमेदवार मागे घ्यावा लागला आहे. दरम्यान, शिंदे गटाने बाबुराव कोहळीकर यांना उमेदवारी जाहीर केल्यानंतर त्यांच्या समर्थकांनी जल्लोष केला आहे.
