Mhada Lottery 2026 : मुंबईत घर घेण्याचं स्वप्न पाहणाऱ्यांसाठी मोठी बातमी आहे. महाराष्ट्र गृहनिर्माण व क्षेत्र विकास प्राधिकरणाने (म्हाडा) मुंबईतील विविध भागांमध्ये तब्बल 120 फ्लॅट्स थेट विक्रीसाठी उपलब्ध करून दिले आहेत. या योजनेचं सर्वात महत्त्वाचं वैशिष्ट्य म्हणजे लॉटरी नाही, ‘प्रथम येणाऱ्यास प्रथम प्राधान्य’ या तत्त्वावर घर मिळणार आहे. (Mhada Lottery 2026 )
ही घरे याआधी लॉटरीत काढण्यात आली होती. मात्र काही तांत्रिक, आर्थिक किंवा अर्जदारांकडून वेळेत प्रक्रिया पूर्ण न झाल्यामुळे ती विकली गेली नव्हती. त्यामुळे म्हाडाने ही घरे पुन्हा खुल्या विक्रीसाठी उपलब्ध करून दिली आहेत. घरांची किंमत 38 लाखांपासून सुरू होऊन थेट 8 कोटींपेक्षा जास्त आहे. दक्षिण मुंबईतील ताडदेव येथील फ्लॅट सर्वात महाग, तर उपनगरांतील काही घरे तुलनेने परवडणारी आहेत.
हे फ्लॅट कांदिवली, चारकोप, वडाला, पवई, ताडदेव, जुहू आणि अंधेरी अशा मुंबईतील मोक्याच्या परिसरांमध्ये आहेत. त्यामुळे मध्यमवर्गापासून उच्च उत्पन्न गटापर्यंत सर्वांसाठी पर्याय उपलब्ध झाले आहेत.
नोंदणी प्रक्रिया 5 फेब्रुवारी 2025 पासून म्हाडाच्या अधिकृत संकेतस्थळावर सुरू होणार आहे. अर्जदारांना ऑनलाइन लॉगिन करून पसंतीचा फ्लॅट निवडता येईल. फ्लॅट निवडल्यानंतर 48 तासांच्या आत घराच्या किमतीच्या 10 टक्के रक्कम भरावी लागेल. ही रक्कम वेळेत न भरल्यास दावा रद्द होईल आणि सुरक्षा ठेव जप्त केली जाईल.
उर्वरित रक्कम भरण्यासाठी म्हाडा तात्पुरते ऑफर लेटर देणार आहे. गृहकर्ज घेणाऱ्यांनी बँकेचे प्री-अप्रूव्हल पत्र अपलोड करणे बंधनकारक आहे. पूर्ण रक्कम आणि मुद्रांक शुल्क भरल्यानंतरच घराचा ताबा मिळणार आहे.
महागड्या घरांच्या बाजारात अडकलेल्या मुंबईकरांसाठी ही योजना म्हणजे लॉटरीशिवाय मिळणारी दुर्मिळ संधी आहे. घर घ्यायचं ठरवलं असेल, तर उशीर केला तर संधी हुकू शकते.
