पुणे: विरारमधील विवा महाविद्यालयाच्या आवारात नवरात्रीनिमित्त आयोजित गरबा कार्यक्रमावरून सध्या मोठे राजकीय आणि धार्मिक वादळ निर्माण झाले आहे. गरब्यासाठी आलेल्या मुलींविषयी दोन तरुणांनी सोशल मीडियावर केलेले अश्लील आणि आक्षेपार्ह चॅट व्हायरल झाले आहे. या चॅटमध्ये त्यांनी “एकही हिंदू मुलगी सोडू नका” असे वादग्रस्त विधान केले आहे. तरुणांनी आक्षेपार्ह व्हॉट्सअॅप संभाषणात मुलींसोबत अनैतिक संबंध ठेवण्याबद्दल चर्चा केली आहे. ज्यामुळे गरबा आयोजनाच्या सुरक्षेवर गंभीर प्रश्नचिन्ह उभे राहिले आहे.
येथे पाहा, संपूर्ण संभाषण
या घटनेला भाजप युवा मोर्चाचे प्रदेश सचिव अशोक शेळके यांनी थेट ‘लव्ह जिहादचा कट’ असल्याचा गंभीर आरोप केला आहे. गरबा केवळ हिंदूसाठीच असा पवित्रा भाजपने घेतला आहे.
चॅट व्हायरल होताच, कॉलेज प्रशासनाने तत्काळ पाऊल उचलले. विवा कॉलेज प्रशासनाने बोईसर पोलीस ठाण्यात तक्रार दाखल केली. या तक्रारीनंतर पोलिसांनी वेगाने कारवाई करत आक्षेपार्ह चॅट करणाऱ्या दोन आरोपींपैकी एका अल्पवयीन आरोपीला ताब्यात घेतले आहे. दुसऱ्या आरोपीचा शोध पोलीस घेत आहेत. पोलीस तपासात होणारे पुढील खुलासे या प्रकरणाचे खरे स्वरूप समोर आणतील. या प्रकरणामुळे राज्यात खळबळ उडाली असून महिला व मुलींच्या सुरक्षेविषयी चिंता व्यक्त केली जात आहे.
