Kalyan News : कल्याणमधील प्रसिद्ध श्री मलंगगडावर भाविकांसाठी एक ऐतिहासिक सुविधा सुरू झाली आहे. रविवारी भाजपाचे आमदार किसन कथोरे आणि सुलभा गायकवाड यांच्या हस्ते देशातील सर्वात लांब फ्युनिक्युलर सेवा लोकार्पित करण्यात आली. आजपासून सुरु झालेल्या या सेवेने भाविकांना गडावर जाणं आता सोपं, जलद आणि सुरक्षित होणार आहे. खास करून वृद्ध, लहान मुलं आणि दिव्यांग प्रवाशांसाठी ही सुविधा मोठा दिलासा ठरणार आहे.
फ्युनिक्युलर सेवा म्हणजे गुरुत्वाकर्षण आणि केबल्सच्या साहाय्याने चालणारी ट्रॉलीसारखी रेल्वे प्रणाली आहे. यात दोन गाड्या एकमेकांच्या विरोधाभासी दिशेने चालतात. देशात अशा सुविधा फार कमी ठिकाणी आहेत आणि मलंगगडावरील ही सेवा देशातील सर्वात लांब फ्युनिक्युलर प्रकल्प ठरली आहे. यामुळे सुमारे २६०० पायऱ्यांचा २ तासांचा चढाईचा प्रवास फक्त १० मिनिटांत पूर्ण करता येणार आहे.
या प्रकल्पाची मूळ कल्पना २००४ मध्ये आमदार किसन कथोरे यांनी मांडली होती, आणि तत्कालीन मुख्यमंत्री विलासराव देशमुख यांच्या काळात मंजुरी मिळाली होती. अनेक अडचणींमुळे प्रकल्प वेळेत पूर्ण झाला नाही, पण २०१२ नंतर कामाला पुन्हा गती मिळाली आणि भाजपाचे प्रदेशाध्यक्ष रवींद्र चव्हाण यांनी निधी उपलब्ध करून दिला. अखेर २०२६ मध्ये हा प्रकल्प साकार झाला.
सुप्रीम कंपनीने सुरुवातीस भाविकांसाठी दोन दिवस ही सेवा विनामूल्य चालवण्याची घोषणा केली आहे. फ्युनिक्युलरसाठी ७० कर्मचाऱ्यांची देखरेख असून, एकावेळी १२० प्रवासी सेवा घेऊ शकतात. या सुविधेमुळे केवळ धार्मिक यात्रेच नाही, तर पर्यटनालाही चालना मिळणार आहे.
राजकीय वर्तुळात एक वेगळा पैलू म्हणजे लोकार्पण सोहळ्याला कल्याण लोकसभेचे खासदार डॉ. श्रीकांत शिंदे अनुपस्थित होते, ज्यामुळे चर्चांना उधाण आले आहे.
