CM Eknath Shinde : मुंबई : मराठा नेते मनोज जरांगे पाटील यांनी उपोषण मागे घेतल्यानंतर मुख्यमंत्री एकनाथ शिंदे यांनी जरांगे पाटील यांच्यासह सकल मराठा समाजाचे आभार मानले. शासनाच्या आवाहनाला मान देऊन उपोषण मागे घेतल्याबद्दल सकल मराठा समाजाचं अभिनंदन करतो, अशा शब्दांत त्यांनी पहिली प्रतिक्रिया व्यक्त केली.
पत्रकार परिषदेत मुख्यमंत्र्यांनी आभार मानले
मुख्यमंत्र्यांनी यावेळी मनोज जरांगे यांची समजूत काढण्यासाठी गेलेले कायदेतज्ज्ञ, मंत्री आणि लोकप्रतिनिधींचे आभार मानले. मनोज जरांगे पाटील यांनी उपोषण मागे घेतलं. त्यांचे आभार मानतो. मराठा समाजाचेही आभार मानतो. शासनाच्या शिष्टमंडळासमोर जरांगे पाटलांनी आपले मुद्दे मांडले. न्यायामूर्ती मारोतराव गायकवाड आणि न्यायामूर्ती सुनील शुक्रे यांचेही अभिनंदन करतो. इतर कायदेतज्ज्ञही या शिष्टमंडळात होते. आमचे मंत्रिमंडळातील सहकारीही होते, या सर्वांनी केलेल्या सहकार्याबद्दल आभार मानत असल्याचे मुख्यमंत्री शिंदे यांनी पत्रकार परिषदेत सांगितले.
१३ हजार नोंदी सापडल्या
या वेळी बोलताना मुख्यमंत्री शिंदे म्हणाले की, “सरकार टिकणारं आणि कायद्याच्या चौकटीत बसणारं आरक्षण देण्यास कटिबद्ध आहे. कुणबी दाखला देण्याचे यश शिंदे समितीला मिळाले आहे. १३ हजार नोंदी सापडल्या ही मोठी कामगिरी आहे. शिंदे समितीने दिवसरात्र काम केले. आणखी कुणबी नोंदी सापडणार आहेत. त्यामुळे खात्री पटल्याने शिंदे समितीने वेळ वाढवून मागितली आहे. कुणबी नोंदी सापडत आहेत. मराठवाड्यात देखील आरक्षण देत आहोत. जरांगे पाटलांचे देखील काही मुद्दे आहेत. त्यांचाही विचार केला जात आहे.”
उपोषणस्थळी कायदे तज्ज्ञ जाण्याची इतिहासातील पहिली वेळ
चर्चेतून प्रश्न सुटू शकतो. मार्ग निघतो यावर आमचा विश्वास होता. म्हणून कायदेतज्ज्ञ आणि मंत्र्यांना पाठवलं. उपोषणस्थळी कायदे तज्ज्ञ जाण्याची ही इतिहासातील पहिली घटना असेल. गायकवाड यांना या विषयाची खडा न् खडा माहिती होती. निवृत्त न्यायाधीशांशी बोलल्यानंतर त्यांना खात्री पटली. निर्णय घेणार तो टिकणारा पाहिजे, अशी आमची इच्छा आहे. त्याला चॅलेंज होऊ नये असे मी त्यांना सांगितले. सरकार बद्दलही जनतेते कोणताही संभ्रम राहू नये, या पद्धतीने चर्चा केली पाहिजे. बच्चू कडू यांच्याशी देखील संवाद झाला आहे, असं एकनाथ शिंदे म्हणाले.
