मुंबई : बीड जिल्ह्यातील सरपंच संतोष देशमुख हत्या प्रकरणात मुख्य सूत्रधार हा वाल्मीक कराड असल्याचं आरोप पत्रातून सिद्ध झालं आहे.वाल्मीक कराडला जिल्हा मध्यवर्ती कारागृहात व्हीआयपी ट्रीटमेंट दिल्याचा दावाही देशमुख कुटुंबीयांनी केला आहे. आता यानंतर कारागृहातील सीसीटीव्ही कॅमेरे बंद असल्याची धक्कादायक माहिती समोर आली आहे.
बीड जिल्ह्यातील सरपंच संतोष देशमुख यांच्या हत्या प्रकरणामुळे राज्यभरातील वातावरण तापलं होतं.या हत्या प्रकरणात देशमुख कुटुंबियांच्या निकटवर्तीयांनी कारागृह असणाऱ्या सीसीटीव्ही फुटेजची मागणी आरटीआय मध्ये केली आहे.मात्र कारागृह अधीक्षकांचे एक पत्र समोर आले आहे त्यात जेलमधील काही महत्त्वाच्या ठिकाणांची आणि बराक मधील कॅमेरे बंद असल्याची धक्कादायक माहिती समोर आली आहे. त्यामुळे आता बीड मधील कारागृहात चाललंय काय? असा सवाल उपस्थित केला जात आहे.
बीड जिल्ह्यातील मास्टरमाईड वाल्मीक कराड हा मंत्री धनंजय मुंडे यांचा निकटवर्तीय आहे. त्यामुळे विरोधकांनी या प्रकरणात मंत्री धनंजय मुंडे यांच्या राजीनाम्याची मागणी केली आहे. एकीकडे बीड जिल्ह्यातील कारागृहात वाल्मीक कराडला असणाऱ्या व्हीआयपी ट्रीटमेंटने सर्वत्र संताप व्यक्त केला जात असताना आता कारागृहातील महत्त्वाच्या ठिकाणी आणि वाल्मीक कराड असलेल्या ठिकाणचे सीसीटीव्ही कॅमेरे बंद करण्यात आले आहेत.याबाबत सीसीटीव्ही कॅमेरे बसवलेल्या डी एम सेल्स कार्पोरेशन या संस्थेला हे पत्र कारागृह अधीक्षकाने दिले असून यात कॅमेरे दुरुस्त करणार असल्याचे सांगितले आहे.
