पुणे : अल्पवयीन मुलाकडून चोरी करून घेणाऱ्या आरोपींना येरवडा पोलिसांकडून अटक करण्यात आली आहे. रोहित नवनाथ ओव्हाळ( वय 29 वर्ष रा. जाधवनगर), रेहान शब्बीर कुरेशी (वय 25 वर्ष रा. हुसेन शहा बाबा दर्ग्याजवळ मेट्रोल कॉर्नर), स्टीफन जॉन शिरसाट (वय 19 वर्षे रा.सोमनाथनगर वडगाव शेरी) अशी अटक करण्यात आलेल्या आरोपींची नावे आहेत. या प्रकरणी सागर विनोद गोयल (वय 42 वर्षे, रा. सदनिका क्रमांक 05, बिल्डींग नंबर 30, मित्तल निवास, प्रतीकनगर, येरवडा) यांनी फिर्याद दिली आहे.
पोलिसांनी दिलेल्या माहितीनुसार, सदर आरोपींनी स्वतःच्या फायद्याकरिता पंधरा वर्षाच्या मुलास लक्ष करून त्याच्याकडून राहत्या घरात चोरी करून घेतली. त्याचबरोबर त्याला व कुटुंब इतर सदस्यांना जीवे मारण्याची धमकी दिली. हा प्रकार नोव्हेंबर 2024 ते मार्च 2025 पर्यंतच्या कालावधीत घडला. यादरम्यान सदर अल्पवयीन मुलाकडून 15000 ते 20000 रुपये रोख रक्कम आणि 25,20,000 हजार रुपये किमतीचे (84 तोळे) सोन्याचे दागिने त्याच्याकडून चोरी करून घेतले. याप्रकरणी सागर विनोद गोयल यांनी येरवडा पोलीस ठाण्यात फिर्याद दिली आहे. या फिर्यादीनंतर पोलिसांनी सदर आरोपींना अटक केली आहे.
सदर आरोपींवर भारतीय न्याय संहिता कलम 308(2), 111,3(5) संरक्षण अधिनियम कलम 75 प्रमाणे गुन्हा दाखल करण्यात आला आहे. या प्रकरणाचा पुढील तपास येरवडा पोलीस स्टेशनचे सहाय्यक पोलीस निरीक्षक विशाल टकले करीत आहेत.
