RBI : कोल्हापूर : आरबीआयने कोल्हापूर येथील बँकेवर मोठी कारवाई केली आहे. तिथल्या नागरी सहकारी बँकेचा परवाना रद्द केला आहे. आरबीआयच्या या कारवाईमुळं एकच खळबळ उडाली आहे. आरबीआयच्या या कारवाईमुळं सहकार क्षेत्रात एकच खळबळ उडाली आहे. इचलकरंजी येथील शंकरराव पुजारी नूतन नागरी सहकारी बँक लिमिटेडचा परवाना रद्द केला आहे.
शंकरराव पुजारी नूतन नागरी सहकारी बँकेत पदाचा दुरूपयोग करत नियमबाह्य कर्ज वाटप करून तब्बल 3 कोटी ५८ लाख ३७ हजार रुपयांचा अपहार केल्याप्रकरणी अध्यक्ष, त्याची पत्नी व शाखाधिकारी यांच्यासह १९ जणांवर गावभाग पोलिस ठाण्यात ऑगस्ट 2023 मध्ये गुन्हा दाखल करण्यात आला होता . याप्रकरणी प्रशासक धोंडीराम आकाराम चौगुले (रा. राजारामपुरी कोल्हापूर) यांनी तक्रार दिली होती. त्यानंतर लगेचच बँकेचा परवाना रद्द झाल्याने ग्राहकांमध्ये चिंतेचे वातावरण पसरले आहे.
बँकेकडे पुरेसं भांडवल आणि कमाईचे साधन नसल्याचे कारण देत आरबीआयने शंकरराव पुजारी नूतन नागरी सहकारी बँक लिमिटेडचा परवाना रद्द केला आहे. भारतीय रिझर्व्ह बँकेन सोमवारी ही कठोर पावलं उचलत मोठी कारवाई केली आहे. रिझर्व्ह बँक ऑफ इंडियानं बँकेला 4 डिसेंबर 2023 पासून सर्व प्रकारचे व्यवहार बंद करण्याचे आदेश दिले होते. बँकेत कोणत्याही ठेवी स्वीकारण्यास किंवा पैशाचे व्यवहार करण्यास पूर्णपणे बंदी घातली होती.
बँकेकडे पुरेसे भांडवल आणि कमाईचे साधन नसल्याने सध्याची बँकेची असलेली आर्थिक स्थिती पाहता बँक सध्याच्या ठेवीदारांना पूर्ण पैसे देऊ शकणार नाही, असे निष्पण्ण झाले होते. बँकेला बँकिंग सेवा चालू ठेवण्याची परवानगी दिल्यास सार्वजनिक ग्राहकांवर विपरित परिणाम होईल असे प्रसिद्ध केलेल्या पत्रकात म्हटले आहे. बँकेच्या गैरव्यवहार प्रकरणी ऑगस्ट 2023 मध्ये बँकेच्या अध्यक्षांसह अधिकाऱ्यांवर गुन्हा दाखल झाला होता.
