पुणे : पुण्यातील एका आयटी अभियंत्याने पत्नीच्या चारित्र्याच्या संशयावरून स्वतःच्याच तीन वर्षाच्या मुलाला संपवलं असल्याची धक्कादायक घटना शुक्रवारी (ता. 21 मार्च )समोर आली होती.या घटनेच्या तपासात धक्कादायक माहिती उघडकीस आली आहे. मुलाचा खून करण्यासाठी संगणक अभियंत्याने चाकू तसेच ब्लेडचा वापर केला होता. नराधम बापाने वापरलेला चाकू पोलिसांनी जप्त केला असून पुरावा नष्ट केल्याप्रकरणी कलमवाढ करण्यात आली आहे. त्याचबरोबर या संगणक अभियंत्याला 28 मार्चपर्यंत पोलीस कोठडी ठेवण्याचे आदेश प्रथम वर्ग न्यायदंडाधिकारी टी. एस.गायगोले यांनी दिले आहेत.
याबाबत अधिक माहिती अशी की, चंदननगर भागात राहणाऱ्या माधव साधुराम टीकेटी याने पत्नीच्या चारित्र्याच्या संशयावरून तीन वर्षीय पोटच्या मुलाचा खून केला. हिम्मत माधव टिकेटी असे खून झालेल्या मुलाचे नाव आहे. आरोपी माधव हा एका माहिती तंत्रज्ञानात कंपनीत कामाला आहे गुरुवारी दुपारी माधव घरात होता मुलीला शाळेतून घरी घेऊन येतो असे सांगून तो तीन वर्षाचा मुलगा हिमत याला घेऊन घराबाहेर पडला. दरम्यान काही वेळाने वाहतूक करणाऱ्या बसमधून मुलगी सोसायटीच्या आवारातून घरी आली.मात्र माधव मुलीसोबत न आल्याने त्याच्या मोबाईल क्रमावर संपर्क साधण्याचा प्रयत्न पत्नीने केला. रात्री उशिरापर्यंत माधव आणि त्याचा मुलगा घरी आला नसल्याने मध्ये रात्री साडेबाराच्या सुमारास पत्नीने चंदननगर पोलीस ठाण्यात पती आणि मुलगा बेपत्ता झाल्याची तक्रार दिली. पोलिसांनी तपास केला असता माधवला ताब्यात घेतले.तपासात त्याने तीन वर्षाचा मुलगा हिम्मत याचा खून केल्याची कबुली दिली.
याप्रकरणी आरोपी माधवला न्यायालयात हजर करण्यात आले. आरोपीने केलेला गुन्हा गंभीर स्वरूपाचा आहे स्वतःच्या मुलाचा अपहरण करून त्याचा खून केल्याप्रकरणी अखेर न्यायालयाने 28 मार्चपर्यंत पोलीस कोठडी ठेवण्याचे आदेश दिले. या प्रकरणाचा अधिक तपास गुन्हे शाखेच्या पोलीस निरीक्षक स्वाती खेडकर करत आहेत.
