Pune News : पुणे : पुणे (Pune) शहरातील वाढत्या वाहतूककोंडीवर (Traffic) उपाय म्हणून केंद्र सरकारकडून मोठ्या रस्ते प्रकल्पांना मंजुरी देण्यात आली आहे. एकूण सुमारे 45,000 कोटी रुपयांच्या विविध प्रकल्पांमुळे शहरातील वाहतूक व्यवस्था सुधारण्यास मदत होणार आहे. केंद्रीय रस्ते वाहतूक आणि महामार्ग मंत्री नितीन गडकरी यांनी याबाबत माहिती देताना पुण्यातील अनेक महत्त्वाच्या रस्ते प्रकल्पांना गती देण्यात येणार असल्याचे सांगितले.
या योजनेंतर्गत पुणे ते अहिल्यानगर महामार्गावर मोठा उन्नत मार्ग उभारण्याचा प्रस्ताव आहे. पुणे-नगर महामार्गावर सुमारे 53.4 किमी लांबीचा उन्नत मार्ग विकसित केला जाणार असून या प्रकल्पासाठी सुमारे 7,514 कोटी रुपयांचा खर्च अपेक्षित आहे. या मार्गावर सुमारे 31 किमी लांबीचा उड्डाणपूल असणार असून तो देशातील सर्वात लांब उड्डाणपूल मानला जाणार आहे. हा सहा पदरी उड्डाणपूल खराडी जंक्शन ते रांजणगाव एमआयडीसीपर्यंत असणार आहे.
या प्रकल्पात दुमजली रस्त्याची संकल्पना वापरण्यात येणार आहे. खराडी ते विठ्ठलवाडी दरम्यान सुमारे 7.4 किमी लांबीच्या भागात खालील स्तरावर चौपदरी रस्ता असेल. त्यावर पहिल्या स्तरावर वाहनांसाठी उड्डाणपूल आणि दुसऱ्या स्तरावर मेट्रो मार्ग तयार करण्याची योजना आहे. त्यामुळे या मार्गावर तीन स्तरांवर वाहतूक शक्य होणार आहे. सध्या पुणे ते शिरूर हा प्रवास साधारणपणे दीड ते पावणे दोन तासांचा होतो. हा उन्नत मार्ग पूर्ण झाल्यानंतर हा प्रवास सुमारे 45 मिनिटांत पूर्ण होण्याची अपेक्षा आहे.
याशिवाय या मार्गाचा पुढे विस्तार करून शिरूर ते छत्रपती संभाजीनगरपर्यंत सुमारे 192 किमी लांबीचा द्रुतगती मार्ग उभारण्याचीही योजना आहे. या प्रकल्पासाठी सुमारे 14,886 कोटी रुपयांचा खर्च अपेक्षित असून त्यामुळे पुणे ते संभाजीनगर प्रवास सुमारे दोन तासांत पूर्ण होऊ शकतो.
दरम्यान, तळेगाव ते चाकण उन्नत मार्ग, चाकण ते शिक्रापूर सहा पदरी मार्ग आणि पुणे-सोलापूर महामार्गावरील हडपसर ते यवत दरम्यान सुमारे 31.50 किमी लांबीच्या रस्त्याचाही विकास केला जाणार आहे. तसेच 8 मार्च रोजी सावित्रीबाई फुळे पुणे विद्यापीठ चौक परिसरात नव्या दुमजली उड्डाणपुलाचे उद्घाटन करण्यात आले. या उड्डाणपुलामुळे शहरातील काही प्रमुख मार्गांवरील वाहतूककोंडी कमी होण्याची अपेक्षा व्यक्त केली जात आहे.
