Pune news : शिक्षक पेशामध्ये करिअर करू इच्छिणाऱ्या उमेदवारांसाठी दिलासादायक बातमी आहे. सावित्रीबाई फुले पुणे विद्यापीठात एकूण १११ शिक्षकी पदांसाठी भरती प्रक्रिया सुरू असून, या भरतीला आता मुदतवाढ देण्यात आली आहे. यामध्ये सहायक प्राध्यापक, सहयोगी प्राध्यापक आणि प्राध्यापक अशा पदांचा समावेश आहे. अनुभवी आणि पात्र उमेदवारांना या संधीचा लाभ घेता येणार आहे. (Pune news)
विद्यापीठातील विविध शैक्षणिक विभागांमध्ये शासनमान्य सहायक प्राध्यापकांची ४७, सहयोगी प्राध्यापकांची ३२ आणि प्राध्यापकांची ३२ अशी एकूण १११ रिक्त पदे भरली जाणार आहेत. या भरतीसाठी ऑनलाइन अर्ज करण्याची शेवटची तारीख आधी ७ डिसेंबर होती. मात्र, आता ही मुदत वाढवून २१ डिसेंबरपर्यंत अर्ज करता येणार असल्याची माहिती प्रभारी कुलसचिव डॉ. ज्योती भाकरे यांनी दिली आहे.
ऑनलाइन अर्ज केलेल्या उमेदवारांना अर्जाची छापील प्रत आणि आवश्यक कागदपत्रे प्रशासन शिक्षक कक्षाकडे सादर करण्यासाठी २६ डिसेंबर सायंकाळी ६ वाजेपर्यंत मुदत देण्यात आली आहे. तसेच, १३ सप्टेंबर २०२४ रोजी प्रसिद्ध झालेल्या जाहिरातीनुसार आधी अर्ज केलेल्या उमेदवारांना २१ डिसेंबरपर्यंत अर्जात दुरुस्ती किंवा बदल करण्याची संधी मिळणार आहे. या कालावधीत नवीन उमेदवारांनाही अर्ज करता येणार आहे.
अर्ज करू इच्छिणाऱ्या उमेदवारांनी ऑनलाइन अर्ज भरण्यापूर्वी संबंधित पदाची जाहिरात काळजीपूर्वक वाचावी, असे आवाहन विद्यापीठ प्रशासनाकडून करण्यात आले आहे. अद्याप अर्ज न केलेल्या उमेदवारांसाठी ही संधी महत्त्वाची असून, वेळेत अर्ज करण्याचे आवाहन करण्यात आले आहे.
