Pune Crime: पुणे: रेल्वे प्रवाशांना ट्रेनमधून त्यांचे मौल्यवान दागिने चोरणाऱ्या हरियाणातील एका आंतरराज्य टोळीतील पाच जणांना पुणे विभागातील रेल्वे पोलिसांनी अटक केली आहे. या कारवाईत आरोपींकडून सुमारे 40 लाख रुपये किमतीचे 288 ग्रॅम वजनाचे सोने आणि हिऱ्यांनी जडलेले दागिने जप्त करण्यात आले आहेत.
अटक करण्यात आलेल्या आरोपींमध्ये मोनू राजकुमार वय 25, हवासिंग फत्ते सिंग वय 66, अमितकुमार बलवंत सिंग वय 31, अजय सतीश कुमार वय 28 आणि कुलदीप रामफळ वय 28 यांचा समावेश आहे. सर्व आरोपी हरियाणा राज्यातील विविध गावांचे रहिवासी आहेत. हे सर्व जण मिळून रेल्वे स्थानकांवर प्रवाशांना लक्ष्य करत असल्याची माहिती तपासात समोर आली आहे.
पोलिसांनी दिलेल्या माहितीनुसार, एक कुटुंब गांधीधाम बेंगळुरू एक्सप्रेसने सुरत येथून मिरजकडे प्रवास करत होते. ट्रेन मिरज स्थानकाजवळ येत असताना, एक महिला सीटखाली ठेवलेल्या बॅगा काढून खाली उतरण्यासाठी दाराकडे जात होती. त्याच वेळी दाराजवळ उभ्या असलेल्या आरोपींनी सामान उतरवण्यास मदत करण्याची तयारी दर्शवली. परिस्थितीचा फायदा घेत आरोपींनी कुटुंबाचे लक्ष दुसरीकडे वळवले आणि एका बॅगेतून सुमारे 24 तोळे वजनाचे सोने आणि हिऱ्यांचे दागिने चोरून नेले.
घटनेनंतर मिरज रेल्वे पोलिस आणि स्थानिक गुन्हे शाखेने तपास सुरू केला. तांत्रिक माहिती आणि गोपनीय सूत्रांच्या मदतीने आरोपींचा माग काढण्यात आला. अटकेनंतर आरोपींना 9 दिवसांची पोलिस कोठडी देण्यात आली. तपासादरम्यान मिरज रेल्वे पोलिस ठाण्यात दाखल दोन गुन्ह्यांशी संबंधित दागिने जप्त करण्यात आले.
