पुणे: खराडी पार्टी प्रकरणात नवा धक्कादायक खुलासा झाला असून एकनाथ खडसे यांचे जावई डाॅ. प्रांजल खेवलकर यांच्याविरुद्ध सायबर पोलीस ठाण्यात गुन्हा दाखल करण्यात आला आहे. एका महिलेने दिलेल्या तक्रारीनंतर सायबर पोलिसांनी भारतीय न्याय संहिता कलम 77 आणि माहिती-तंत्रज्ञान कायदा 2000 च्या कलम 66 (ई) अंतर्गत गुन्हा नोंदवला आहे.
25 जुलै रोजी खराडीतील एका हॉटेलमध्ये झालेल्या पार्टीवर गुन्हे शाखेने छापा टाकला होता. या छाप्यात डाॅ. प्रांजल मनीष खेवलकर यांच्यासह निखिल जेठानंद पोपटाणी, समीर फकीर महमंद सय्यद, सचिन सोमाजी भोंबे, श्रीपाद मोहन यादव, इशा देवज्योत सिंग आणि प्राची गोपाल शर्मा यांना अटक करण्यात आली होती. या वेळी पोलिसांनी 2 ग्रॅम 70 मिलीग्रॅम कोकेन, 70 ग्रॅम गांजासदृश पदार्थ, हुक्का सेट, 10 मोबाईल, सुगंधी तंबाखू, दोन गाड्या, मद्याच्या बाटल्या असा मुद्देमाल जप्त केला होता. आरोपींना न्यायालयाने येरवडा कारागृहात न्यायालयीन कोठडीत पाठवले होते.
पोलिस तपासात आरोपींनी एप्रिल व मे महिन्यातही अशा प्रकारच्या पार्ट्यांचे आयोजन केले असल्याचे उघड झाले. आरोपींकडून जप्त केलेल्या मोबाइलमध्ये महिलांशी झालेल्या संवादांचे रेकॉर्ड, पार्टीतील छायाचित्रे आणि व्हिडिओ आढळून आले आहेत. या प्रकरणाबाबत एका संस्थेने राज्य महिला आयोगाकडे तक्रार दिली होती. त्यानंतर महिला आयोगाने पुणे पोलिसांना सखोल चौकशी करण्याचे आदेश दिले. आयोगाकडून पोलीस आयुक्त अमितेशकुमार यांना याबाबत अधिकृत पत्र देण्यात आले आहे.
2022 ते जून 2025 या कालावधीत डाॅ. खेवलकर यांनी विविध हॉटेलमध्ये एका महिलेला बोलावून तिची संमती न घेता निर्वस्त्र अवस्थेतील छायाचित्रे काढली, असा धक्कादायक आरोप त्या महिलेने केला आहे. या छायाचित्रांचा गैरवापर होण्याची शक्यता असल्याने तिने नुकतीच सायबर पोलीस ठाण्यात फिर्याद दिली. पोलिसांनी डाॅ. खेवलकर यांचा दुसरा मोबाइल, कॅमेरा, लॅपटॉप तसेच संबंधित हॉटेलमधील सीसीटीव्ही फुटेज असलेले डीव्हीआर ताब्यात घेतले आहे. उर्वरित सहा आरोपींचे मोबाइल व पेन ड्राईव्ह जप्त करून त्याचा तांत्रिक तपास सुरू आहे.
या नव्या तक्रारीमुळे खराडी पार्टी प्रकरणाला वेगळे वळण लागले असून, डाॅ. खेवलकर यांच्याविरुद्धचा तपास आणखी गडद होण्याची शक्यता व्यक्त केली जात आहे.
