पिंपरी चिंचवड: पिंपरी-चिंचवडमधील (Pimpri-Chinchwad News) भोसरी अन्न नागरी पुरवठा कार्यालयात (Pune Crime) लाच घेतल्याप्रकरणी परिमंडळ (Pune News) अधिकारी गजानन देशमुख यांना रंगेहात अटक करण्यात आली आहे. तक्रारदार हे अपंग असून समाजकार्य करतात. त्यांना शासकीय कागदपत्रांची माहिती असल्याने ते आपल्या 14 ओळखीच्या लोकांसाठी रेशन कार्ड काढण्यासाठी मदत करत होते. प्रत्येक व्यक्तीने 50 रुपये शासकीय फी आणि अधिकारपत्र दिल्यानंतर तक्रारदारांनी सर्व 14 जणांचे प्रस्ताव तयार करून आवश्यक कागदपत्रे जोडली. ऑनलाइन फी भरल्यानंतर सर्वांना रेशन कार्डचे N नंबर मिळाले. (Breaking News)
त्यानंतर तक्रारदारांनी हे रेशन कार्ड मिळवण्यासाठी भोसरी अन्न नागरी पुरवठा विभागातील परिमंडळ अधिकारी गजानन देशमुख यांची भेट घेतली. देशमुख यांनी प्रत्येक रेशन कार्डासाठी 900 रुपये प्रमाणे 12,600 रुपये लाच मागितली. तक्रारदारांना लाच देण्याची इच्छा नसल्याने त्यांनी 10 डिसेंबर 2025 रोजी लाचलुचपत प्रतिबंधक विभाग, पुणे येथे तक्रार दाखल केली.
11 डिसेंबर 2025 रोजी पडताळणीदरम्यान देशमुख यांनी 14 रेशन कार्डांसाठी सुरुवातीला 19,000 रुपये मागितले. 10 कार्डांसाठी प्रत्येकी 1,500 रुपये आणि उर्वरित 4 कार्डांसाठी प्रत्येकी 1,000 रुपये अशी मागणी होती. तडजोडीनंतर त्यांनी 16,000 रुपये स्वीकारण्याचे मान्य केल्याचे स्पष्ट झाले. त्याच दिवशी लाचलुचपत विभागाने सापळा रचला. तक्रारदाराकडून 16,000 रुपये स्वीकारताना गजानन अशोकराव देशमुख यांना दुपारी 2.19 वाजता त्यांच्या भोसरी कार्यालयातच रंगेहात पकडण्यात आले.
ही कारवाई पोलीस उप आयुक्त आणि पोलीस अधीक्षक शिरीष सरदेशपांडे, अपर पोलीस अधीक्षक अजीत पाटील, अपर पोलीस अधीक्षक अर्जुन भोसले यांच्या मार्गदर्शनाखाली लाचलुचपत प्रतिबंधक विभाग, पुणे यांनी यशस्वीरीत्या पूर्ण केली. या घटनेमुळे पुरवठा विभागातील लाचखोरीचे आणखी एक प्रकरण उघड झाले आहे.
