पुणे : स्वारगेट बसस्थानक अत्याचार प्रकरणातील नराधम आरोपी दत्ता गाडे याला जिल्हा सत्र न्यायालयाने 12 मार्चपर्यंत पोलीस कोठडी सुनावली आहे. दरम्यान पोलिसांकडून सुरू असलेल्या चौकशीतून आरोपीबाबत नवनवीन धक्कादायक खुलासे समोर येत आहेत. यातून आरोपी दत्ता गाडे याची राजकीय वरदहस्तांमुळे गावांमध्ये दहशत असल्याची माहिती समोर आली आहे.
शिरूर तालुक्यातील गुनाड गावातील राजकीय नेत्यांसोबत आरोपी दत्ता गाडे याचे जवळचे संबंध होते. मात्र तंटामुक्त समितीच्या निवडणुकीत त्याने एकावर चक्क चाकू उभारला होता आरोपीच्या अशा कृत्यामुळे गावातील लोक ही त्याला वैतागुन गेले होते,अशी कुंडली स्थानिक गावकऱ्यांनी मांडली. ज्यावेळी स्वारगेट अत्याचार प्रकरणात दत्ता गाडे याचं नाव आलं त्यावेळी गावकरी पोलिसांच्या बाजूने उभे राहिले. नराधमाला पकडण्यास गावकऱ्यांनी मदत केली. आरोपी गाडे राजकीय लोकांच्या ओळखी वाढवून गावांमध्ये दहशत वाजवण्याचा प्रयत्न करत असे. त्याने गावात माजवलेल्या दहशतीमुळेच गावकऱ्यांनी पोलिसांना मदत केली असल्याची माहिती समोर आली आहे.
अलीकडेच दत्ता गाडे याचे राजकीय कनेक्शन समोर आले होते. अजित पवार गटाचे आमदार माऊली कटके यांचा फोटो त्याच्या व्हाट्सअप डीपीला लावण्यात आला होता. माजी आमदार अशोक पवार यांच्या वाढदिवसाच्या बॅनरवर देखील आरोपी झळकला होता. सध्या पोलिसांकडून सुरू असलेल्या चौकशीत आरोपीची खडानखडा माहिती समोर येत आहे.दत्तात्रय गाडे याच्यावर राजकीय वरदहस्त असल्याचा आरोप होत आहे. त्यामुळेच गाडे याने गावांमध्ये दहशत निर्माण केली होती. त्याच्या या दहशतीमुळेच त्याच्यासमोर जाण्यास कोणी तयार होत नव्हते, अशी माहिती समोर येत आहे.
स्वारगेटसारख्या पुणे शहरातील वर्दळ असलेल्या मध्यवर्ती भागात धक्कादायक प्रकार घडल्याने शहरातील महिलांच्या सुरक्षित संदर्भात प्रश्न उपस्थित केला जात आहे. यावर आता शहरातील वर्दळीच्या ठिकाणी सुरक्षा वाढवण्यात येणार असून पुन्हा अशा घटना घडू नये यासाठी उपाय योजना राबविण्यात येणार आहेत.
