Loni Kalbhor : कपडे बदलुन आणण्याकरिता गेलेल्या 15 वर्षाच्या मुलीला अज्ञात इसमाने आमिष दाखवून पळवून नेल्याची घटना घडली आहे. ही घटना लोणी काळभोर परिसरात घडली असून बुधवारी (ता.3) सायंकाळी सहा वाजण्याच्या सुमारास उघडकीस आली आहे. (Loni Kalbhor)
याप्रकरणी 15 वर्षीय मुलीच्या वडिलांनी लोणी काळभोर पोलीस ठाण्यात फिर्याद दिली आहे. त्यानुसार अज्ञात इसमाच्या विरोधात अपहरणाचा गुन्हा दाखल करण्यात आला आहे. पोलिसांनी दिलेल्या माहितीनुसार, फिर्यादी हे 55 वर्षाचे असून लोणी काळभोर परिसरात कुटुंबासोबत राहतात. त्यांना एक 15 व एक 14 वर्षाची मुलगी आहेत.
फिर्यादी यांची 15 वर्षाची मुलगी एका पिशवीमध्ये कपडे भरुन टेलर्सच्या दुकानात कपडे बदलुन आणण्याकरीता बुधवारी (ता.3) सायंकाळी सहा वाजण्याच्या सुमारास घरातून निघून गेली होती. बराच वेळ झाला तरी मुलगी घरी आली नव्हती. म्हणून मुलीच्या नातेवाईकांनी तिचा शोध लोणी काळभोरसह परिसरात केला. तसेच नातेवाईकांकडे देखील विचारणा केली. परंतु मुलगी कोठेही सापडली नाही.
कोणी तरी अज्ञात इसमाने भूलथापा देऊन, लबाडीच्या हेतूने फिर्यादी यांच्या कायदेशीर संरक्षणातून मुलीला पळवून नेले आहे. अशी तक्रार अल्पवयीन मुलीच्या वडिलांनी लोणी काळभोर पोलीस ठाण्यात दिली आहे. त्यानुसार अज्ञात इसमाच्या विरोधात भारतीय न्याय संहिता कलम 137 (2) प्रमाणे गुन्हा दाखल करण्यात आला आहे. पुढील तपास लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली सहाय्यक पोलीस निरीक्षक अंकुश बोराटे करत आहेत.
