Jaydutt Kshirsagar : बीड : माजी आमदार जयदत्त क्षीरसागर यांनी आज पत्रकार परिषद घेतली. यावेळी त्यांनी चार दिवसांपूर्वी मराठा आंदोलनादरम्यान, बीडमध्ये त्यांच्या कार्यलयाला आणि घराला आग लावण्यात आली होती. त्यावर त्यांनी सविस्तर भाष्य केलं. क्षीरसागर कुटुंब हे बीड जिल्ह्याच्या राजकारणातील बडे प्रस्थ आहेत. यात त्यांचं किती नुकसान झालं, याबाबतची माहिती दिली.
पत्रकार परिषदेत बोलताना त्यांनी म्हटले की, ‘बीडचा इतिहास हा सर्व जातीधर्माचा आहे. तरीही मराठा आरक्षणाच्या आंदोलनाच्या निमित्ताने अशी घटना घडणं ही अतिशय दुर्देवी बाब आहे. पोलीस, प्रशासन सर्व घटनेचा तपास करेल. त्यावर भाष्य करणं आता योग्य ठरणार नाही. या जाळपोळीमागे कोण मास्टरमाईंड आहे. कुठल्या जातीची लोकं आहेत, कुठल्या उद्देशाने आली होती हे सगळं समोर आलं आहे’, असं जयदत्त क्षीरसागर म्हणाले.
असे प्रकार घडणं चिंतेची बाब
‘अशा घटना घडत असतील आणि असे पायंडे पडत असतील तर आज कोण सुरक्षित आहे? तर मला वाटतं की ही अतिशय चिंतनीय बाब आहे. प्रशासनाने ही बाब सरकारच्या कानावर टाकली आहे. आता सगळ्या गोष्टी समोर येतील, असं मला वाटतं’, अशी प्रतिक्रिया जयदत्त क्षीरसागर यांनी दिली.
गुन्हेगाराला शिक्षा होणारच
‘गृहमंत्री देवेंद्र फडणवीस यांच्याशी मी सगळ्या गोष्टी विशद केल्या. बीड जिल्ह्यात घडलेल्या घटनांवर त्यांनी प्रसारमाध्यमांना देखील प्रतिक्रिया दिलीय. कलम 307 आणि 436 ची कलम जिथे गरज आहे तिथे लावले जातील. कुणाही दोषी गुन्हेगाराला मोकळं सोडणार नाही, अशी सरकारची भूमिका आहे आणि ती रास्त आहे’, असं जयदत्त क्षीरसागर म्हणाले.
त्यावेळी ऑफिसमध्ये तीन कर्मचारी होते
‘या जाळपोळीत माझ्या ऑफिसचं फार नुकसान झालंय. तिथली गाडी जळाली आहे. घरच्या पाच ते सहा गाड्या जळाल्या आहेत. सर्वात महत्त्वाचं म्हणजे जीवाला धोका होता, घरात जावून मारणं. ऑफिसमध्ये तीन कर्मचारी होते. ते हात जोडत होते तरी त्यांना बाहेर पडू दिलं नाही. शेवटी ते तिथून उड्या मारुन पळाले. त्यांनाही जाळण्याचा प्रयत्न झाला’, अशी माहिती जयदत्त क्षीरसागर यांनी दिली.
घरात सर्वजण होते
‘घराला आग लावली तेव्हा घरात सर्वजण होते. भूषण, त्याची पत्नी, योगेश, त्याची पत्नी, रवीची मुलं, संदीपची पत्नी, त्याची मुलं, हेमंत ही सर्वजण घरात होते. परिवाराचे एवढे सदस्य घरात असताना जाणीवपूर्वक पेट्रोल बॉम्ब फेकणं, दगड फेकणं आणि त्यांना कोंडून मारणं, हा प्रकार केवढा क्रूर आणि निष्ठूर होता. ब्रिटिशांच्या आणि निजामाच्या काळातही असे प्रकार झाले नाहीत. कितीही कुणीही असला तरी मास्टरमाईंड शोधून काढणं आणि त्यांना नियमाप्रमाणे शिक्षा देणं जरुरीचं आहे’, असं जयदत्त क्षीरसागर म्हणाले.
