Dhule Politics : धुळे जिल्ह्यात एक मोठी राजकीय उलथापालथ झाली आहे. आगामी स्थानिक स्वराज्य संस्थांच्या निवडणुकीच्या पार्श्वभूमीवर शिवसेना शिंदे गटाने भाजप, काँग्रेस आणि राष्ट्रवादी काँग्रेस अजित पवार गटाला मोठा धक्का दिला आहे. अनेक बड्या नेत्यांसह पदाधिकाऱ्यांनी धनुष्यबाणाचे चिन्ह हाती घेतल्याने धुळ्यातील राजकीय समीकरणांमध्ये मोठा बदल झाला आहे.
पिंपळनेर नगरपरिषदेवर आपला झेंडा फडकवण्यासाठी शिंदेसेनेने जोरदार तयारी सुरू केली आहे. अलीकडेच धुळ्यामध्ये झालेल्या एका कार्यक्रमात आमदार मंजुळा गावित यांच्या उपस्थितीत काँग्रेस, भाजप आणि राष्ट्रवादी काँग्रेस अजित पवार गटातील अनेक पदाधिकारी व कार्यकर्त्यांनी शिंदेसेनेत प्रवेश केला. त्यामुळे शिंदेसेनेचा विस्तार जिल्ह्यात झपाट्याने वाढत असून, हा प्रवेश भाजपसाठी मोठा धक्का मानला जात आहे.
धुळे जिल्ह्यातील पिंपळनेर नगरपरिषदेची निवडणूक लवकरच होणार आहे. त्यामुळे प्रत्येक पक्षाने आपापली रणनीती आखण्यास सुरुवात केली आहे. मात्र, शिंदेसेनेत झालेल्या या मोठ्या प्रवेशामुळे स्थानिक राजकारणाचे समीकरण बदलण्याची शक्यता वर्तवली जात आहे. नव्या कार्यकर्त्यांच्या आगमनामुळे शिंदे गटाला ग्रामीण आणि शहरी भागात दोन्ही ठिकाणी बळ मिळणार आहे.
या प्रवेश सोहळ्यात आमदार मंजुळा गावित यांनी पक्षाच्या कार्यकर्त्यांना मार्गदर्शन करताना सांगितले की, मुख्यमंत्री एकनाथ शिंदेंच्या नेतृत्वाखाली राज्यात विकासाचे नवे पर्व सुरू झाले आहे. सर्वसामान्य जनतेचा विश्वास संपादन करण्यासाठी शिवसेना शिंदे गट सातत्याने प्रयत्न करत आहे. धुळे जिल्ह्यात पक्षाचे संघटन अधिक बळकट करण्यासाठी हा पक्षप्रवेश ऐतिहासिक ठरणार असल्याचे त्या म्हणाल्या.
दरम्यान, शिंदेसेनेत झालेल्या या मोठ्या पक्षप्रवेशानंतर भाजप, काँग्रेस आणि राष्ट्रवादी काँग्रेस अजित पवार गट या तिन्ही पक्षांच्या गोटात चिंतेचे वातावरण निर्माण झाले आहे. आगामी निवडणुकीपूर्वी शिंदेसेनेचा विस्तार आणि वाढलेला जनाधार पाहता, धुळ्यातील राजकीय लढत अधिक चुरशीची होणार असल्याचे राजकीय वर्तुळात म्हटले जात आहे.
