धुळे: धुळे जिल्ह्यातील मोहाडी परिसरात (Crime News) एका वृद्ध महिलेची अत्यंत क्रूरपणे हत्या करण्यात आली होती, ज्याचा शोध घेण्यास स्थानिक गुन्हे शाखेला यश आले आहे. १५ डिसेंबर रोजी सकाळी मोहाडीच्या वाल्मिकी आंबेडकर वसाहतीत ७५ वर्षीय लीलाबाई सूर्यवंशी यांचा मृतदेह रक्ताच्या थारोळ्यात त्यांच्याच घरात सापडला होता. या घटनेमुळे परिसरात एकच खळबळ उडाली होती.
मिळालेल्या माहितीनुसार, सागर राजू कोळी नावाचा २५ वर्षांचा तरुण चोरीच्या उद्देशाने लीलाबाईंच्या घरात शिरला होता. तो स्वयंपाकघरातील गॅस सिलेंडर चोरण्याचा प्रयत्न करत असताना लीलाबाईंना जाग आली. त्यांनीप्रतिकार करण्याचा प्रयत्न केला, तेव्हा आरोपीने संतापून त्यांच्यावर स्टीलच्या खुरपीने गुप्तांगात वार केले आणि वृद्ध महिलेची निर्घृण हत्या केली. हत्या केल्यानंतर आरोपीने तिथून सिलेंडर आणि काही घरगुती वस्तू चोरून नेल्या होत्या.
पोलीस तपासादरम्यान घटनास्थळाची पाहणी करत असताना घड्याळ सापडली. एका खबऱ्याने त्या घड्याळावरून संशयित सागर कोळीबद्दल माहिती दिली. पोलिसांनी तातडीने तपास करत आरोपीला ताब्यात घेतले. पोलिसांनी कसून चौकशी केल्यावर त्याने चोरीसाठी हत्या केल्याची कबुली दिली.
