करमाळा: सोलापूर जिल्ह्यातील करमाळा तालुक्यात काल मध्यरात्री अचानक सुरू झालेल्या ढगफुटीसदृश (Heavy Rain) पावसाने पश्चिम भागात मोठा हाहाकार माजवला आहे. या तुफान पावसामुळे अनेक पूल पाण्याखाली गेले असून, शेती पिकांचेही मोठ्या प्रमाणात नुकसान झाले आहे.
पिकांचे मोठे नुकसान, अनेक गावांमध्ये पाणी शिरले
मुसळधार पावसामुळे अनेक शेती पिके पाण्याखाली गेली आहेत. शेतकऱ्यांच्या उभ्या पिकांचे मोठे नुकसान झाले असून, जनावरांच्या चाऱ्याचेही नुकसान झाले आहे. अनेक गावांमध्ये पावसाचे पाणी शिरल्यामुळे घर- शेती पाण्याने तुंबली आहे, ज्यामुळे जनजीवन पूर्णपणे विस्कळीत झाले आहे. ओढे, नाले आणि रस्त्यांवरून पाण्याचा प्रवाह प्रचंड वेगाने वाहत असल्यामुळे वाहतुकीवरही परिणाम झाला आहे.
प्रशासनाकडून तातडीने मदतीची मागणी
या गंभीर परिस्थितीमुळे नागरिकांमध्ये चिंतेचे वातावरण आहे. स्थानिक नागरिकांनी प्रशासनाला या ढगफुटीसदृश परिस्थितीचा तातडीने आढावा घेण्याची विनंती केली आहे. तसेच, नुकसानग्रस्त भागांचे पंचनामे करून बाधित शेतकऱ्यांना आणि नागरिकांना त्वरित मदत देण्याची मागणीही करण्यात येत आहे.
