लोणी काळभोर : कंटिन्युइंग मेडिकल एज्युकेशन (CME) हे सतत वैद्यकीय शिक्षण आहे. जे वैद्यकीय क्षेत्रातील लोकांना सक्षमता राखण्यास आणि त्यांच्या क्षेत्रातील नवीन आणि विकसनशील क्षेत्रांबद्दल जाणून घेण्यास मदत करते, असे प्रतिपादन लोणी काळभोर (ता. हवेली) येथील ‘माईर्स’ विश्वराज हॉस्पिटलच्या संचालिका डॉ. अदिती कराड यांनी केले.
भारतीय वैद्यकीय संघटना, इंदापूर यांच्या सहकार्याने इंदापुरमध्ये क्रेडिट पॉइंट व सतत वैद्यकीय शिक्षण कार्यक्रमाचे नुकतेच आयोजन करण्यात आले होते. या वेळी डॉ. अदिती कराड बोलत होत्या. या वेळी अस्थिरोगतज्ज्ञ डॉ. प्रमोद सुर्वे, प्रजनन तज्ज्ञ डॉ. अश्विनी काळे, यूरोलॉजिस्ट डॉ. संजय पी. डांगर, रक्तरोगतज्ज्ञ डॉ. अभिजित बाहेती आदी मान्यवर उपस्थित होते.
या वेळी बोलताना डॉ. अदिती कराड म्हणाल्या, सतत वैद्यकीय शिक्षण कार्यक्रम आयोजित करण्याची विश्वराज हॉस्पिटलची वचनबद्धता, उच्च दर्जाची आरोग्य सेवा प्रदान करण्यासाठी आणि वैद्यकीय प्रगतीमध्ये आघाडीवर राहण्यासाठीचे समर्पण अधोरेखित करते. वैद्यकीय ज्ञान आणि पद्धती सध्या प्रभावी राहतील, याची खात्री करून हॉस्पिटलमध्ये काम करणार्या आरोग्यसेवा व्यावसायिकांना आणि सेवा दिलेल्या रूग्णांना या कार्यक्रमांचा नक्की फायदा होईल.
दरम्यान, डॉ. अदिती कराड यांनी भारतीय वैद्यकीय संघटना इंदापुरच्या डॉक्टरांचे समर्पण आणि वचनबद्धतेबद्दल अभिनंदन केले. तसेच पुढील वाटचालीसाठी शुभेच्छा दिल्या. तसेच कराड यांनी इंदापूर येथे क्रेडिट पॉइंट उभारण्यासाठी मदत केल्याबद्दल भारतीय वैद्यकीय संघटनेचे आभार मानले. या कार्यक्रमाला २५० डॉक्टर उपस्थित होते.
